Sekretari PKR Baram ngaga ripot bekaul mesej betenah PM di ‘Facebook’
Sekretari Parti Keadilan Rakyat ( PKR) Baram Dennis Along udah ngaga ripot polis ditu bedau lama bekaul enggau petenah ti dibantai ba media rama ‘Facebook’ bejaika Menteri Besai (PM) Tun Dr Mahathir Mohammad.
Ripot nya udah digaga iya ba Indu Opis Polis Miri pukul 2.30 lemai.
Dennis madahka iya sedarka mesej nya di akaun ‘Facebook’ urung pukul 10.30 malam Hari Empat tu tadi.
“Aku meda orang ti beempu akaun ‘Facebook’ nya nganjung mesej madahka Tun Dr Mahathir iya nya apai kleptokrasi lalu madahka udah beratus juta duit rayat udah diambi ke ngaul mayuh skandal.
“Tuju iya ngaga ripot tu iya nya ngambika raban penerit adat ulih ngadu pengawa ti patut lalu nasat enggau silik sapa ti ngempu akaun ‘ Facebokk’ nya lalu meri ukum ti patut laban iya udah betenahka Menteri Besai,” ku iya madah ba siti penerang berita bedau lama.