Ali limpang ngabang TBC, ngaul rat ketuai komuniti China

Kaban Parlimen Saratok, Ali Biju udah ngelimpangka jam diri ngabang Taun Baru China (TBC) ngagai rumah bala ketuai raban bansa ngelingi Sarawak pagi kemari.

Antara pengerami nerima pengabang TBC bisi digulu iya baka rumah Pemacha Tan Yok Ngee ba Pasar Saratok.

Kelimpah ari nya, Ali mega ampit ngabang ngagai beberapa buah rumah bansa Tiong Hua ba Pasar Roban.

Lebuhka dirandau, iya madahka pejalai baka tu ulih ngerapitka agi sintal kaul enggau pangan diri kelebih agi begulai enggau bansa ti ngintu hari besai nya.

“Tu awak ungkup kitai ari bansa bukai, kelebih agi Iban enggau Melayu ngusung rumah bala bakih bansa Tiong Hua ti ngintu pengerami tu seraya ngenegapka kaul kitai begulai,” ku iya.

NGABANG TBC: Ali (tengah) begambar ungkup kenang begulai enggau Pemancha Tan Yok Ngee (dua kanan) sereta sida sebilik lebuh ngabang TBC ba rumah iya di Saratok pagi kemari.