Lebih 1,000 pengabang nedat Pengerami Ngintu TBC DAP di Sibu

Penatai lebih 1,000 iku mensia mayuh ngulu Pengerami Ngintu Taun Baru China ( TBC) Parti Tindakan Demokratik ( DAP) di Sibu nyangka bepun ari pemutus Pengawa Bepilih Besai Ke- 14 ( PRU) suba ti ngubah perintah besai dipegai Pakatan Harapan.

Melabaka pekara tu, Kaban Parlimen Sibu Oscar Ling madah, udah sida nyadi perintah, pekara nya bela nya berubah.

“Tang taja pia, kitai meri besai terima kasih ngagai pengerami ke diatur kitai tu,” pia ku iya maya berandau enggau pengarang berita.

Pengerami tu diatur ba Indu Opis DAP di Taman Rajang ditu, kemari.

Kaban Kunsil Nengeri ( ADUN) Pelawan, David Wong maya tu bela berasai temegah ati enggau penyampau mensia mayuh ke bisi datai.

“Pengerami tu diatur kitai ninting taun.

“Taun tu dipeda bisi beru- bah mimit, rami agi ari taun ke udah.

“Terima kasih ngagai rayat ti semampai nyukung ngelama tu ngujungka kami nyadi perintah taja di Sarawak kami agi nyadi penyakal,” ku iya madah.

Bela nyambut penatai pengabang maya tu iya nya ADUN Bukit Assek Irene Chang.

Ku iya, pengerami ke diatur sehari nya dikena bansa China bekunsi pengerichah ngintu Taun Baru China begulai enggau rayat ti datai ari pupu raban bansa sereta enda sama jalai pengarap.

Kelimpah sida tiga, Kaban Parlimen Lanang Alice Lau bela dipeda kemerah nyambut penatai mensia mayuh belabuh ari pukul 9 pagi.