SEB-RTM Miri gagit nurai sejarah tebah sape 50 jam nadai ngetu
Sepenyampau 50 pemuzik sape deka begulai ngemujurka tebah muzik sape nadai ngetu pengelama 50 jam kena 15 nyentuk 17 Februari tu bepalan ba Auditorium RTM Miri.
Menijar Kaul Komuniti Opis Tanggungpengawa Rama enggau Sustainabiliti Sarawak Energy Berhad (SEB), Augustine Supen Taja madahka pengawa pemerindang nya deka dipasuk dalam Malaysian Book Of Record.
“Tu program belalauka main asal ti diatur begulai SEB enggau RTM Miri, pemadu nyelai, merindang ngena sape nadai ngetu tu deka dipasuk dalam Malaysian Book Of Record,” ku iya ba penerang kemari.
Kelimpah ari pemerindang sape ti deka disereta pemain tebilang ari sitak Baram, Belaga enggau Tubau, mega bisi pengawa bejualka kraf jari, manik, pemakai enggau ai irup.
Ku iya nambah, program kerejasama SEB enggau RTM Miri tu nyadi siti pelasar dikena ngaul semak komuniti menua nya nengah muzik pemerindang.
“Program CSR digelar Warisan Sape Telang Usan tu udah diatur keterubah iya dalam taun 2016 ti disereta sepenyampau 20 iku raban nembiak Baram bepalan ba Long San Baram.
Penyelai sekali tu iya nya 20 nembiak ti belajar seni muzik sape dalam timpuh dua taun tu mega deka merindang sehari nya,” ku iya.
Nya alai mensia mayuh kelebih agi di Miri ditesau datai ngerichahka agi program pemerindang sape nadai ngetu pengelama 50 jam.