Jamit ngena awak TBC ngerapitka kaul bebakih, diau bebaik di Kapit
Kaban Kunsil Nengeri (ADUN) Bukit Goram, Jefferson Jamit Unyat ngabang ngagai rumah bala bakih iya nyerumba pengerami Taun Baru China (TBC) di Kapit, seraya ngenataika pesan lantang ngintu taun baru.
Lemai kemari Jamit udah ngabang ngagai rumah Chairman Malaysian Red Crescent Society Kapit enggau mega kaban aktif Kelab Lion di Kapit, Dr Sia Tih Kong ba Jalai Padang Sukan ditu.
Jamit disempulang Penghulu Pasang Tubak, Sapit Chairman PBB Bukit Goram Watson Awan, Ketuai Nembiak PBB Bukit Goram Jason Jarrau, Chairman SADIA Edward Manggah, Chairman SUPP Kapit Ling Thian Ing, Chairman Serakup Kwang Tung Kapit Kong Sien Hua, Kaunsilor Jenny Yii, Ketuai Nembiak SUPP Kapit Tommy Wong sereta bala bukai.
Penatai Jamit enggau bala bukai disambut manah orang ke ngempu pengerami sereta berasai lantang nerima penatai pengari rayat ngusung rumah sida.
“Aku deka meri tabi puji enggau pesna lantang ati nuju semua bala bakih bansa China enggau sida ti ngintu hari besai tu. Aku ngajihka semua betuah belimpah, kaya raja, diau likun enggau lantang.
“Tu sampi aku dalam taun deka datai, kitai deka kering agi beserakup enggau bebakih. Sida ti belajar teulihka pemujur ba sekula. Bala komuniti dagang terus bulih pengun- tung bedagang. Sida ti kereja deka meruan gawa.
“Aku ngarapka semua kita ulih ngaul kerejasama rat nyadi siti tim pulaika pemaik Kapit, menua kitai,” ku Jamit besampi.
Ku iya, pengerami TBC tu siti ari hari besai diintu d Malaysia baka Gawai Dayak Hari Raya Puasa Aidilfitr enggau ke bukai.
“Bala komuniti endang diperansang ngusung pangan diri dikena ngerapitka tanggam kaul bebakih ke bisi disintal diatu. Nengah pengeram tu, kitai deka mereti agi pasa budaya enggau pengawa asa dikemeran bala bukai dikena nerenakka penyerakup dalam pengelain laban kitai diau dalam komuniti pupu bansa,” ku Jamit meransang.