Nembiak ari dua palan latih di Miri disikap ngena penemu, chara ngerara api

Sepenyampau 100 iku nembiak baru renggat 1/2019 Palan Latih Industri (ILP) Miri udah ngulu licha Pengelikun Penusah Angus nyerumba Minggu Nanggam Kaul (MSR) ditu, apin lama ke udah.

Licha nya udah diembing lapan iku kaban bomba ari Opis Bomba enggau Penyah Penusah ( BBP) Lopeng ti diketuaika Penguasa Bomba Kanan II Nasir.

Bala nembiak diberi penerang sentang pengelikun penusah angus sereta diajar chara ngerara api.

Kelimpah ari licha enggau mantaika chara ngerara api, sida mega diberi latih ngerara api ngena perengka ngerara api sereta chara ngena chara bantu pemun.

Ba lansa bukai, licha t sama mega udah diatur ba Palan Pengelandik Nembiak Menua (IKBN) Miri ti ngau 68 iku nembiak baru rejista nyerumba Program Minggu Paradigma renggat 1/2019.

Licha udah dikenataika Penulung Kanan Penguasa Bomba (PKPgB) Terry Robson disaup tiga kaban bomba ari Opis Bomba enggau Penyah Penusah Lopeng.

Bala nembiak mega diber latih praktikal nyelamatka orang enggau latih ngerara api ngena perengka pengerara api.

Tuju kededua latih tu dikena nambahka penyedar enggau nyikap bala nembiak nap penusah ngenyit nyadi.

RIPIH PENGAWA: Bala nembiak diterang enggau diajar chara ngerara api ngena perengka pengerara api.

NGIRI PENEMU: Bala nembiak IKBN Miri mega dipadah chara nyelamatka orang maya bisi penusah angus nyadi.

LATIH: Siku ari nembiak IKBN Miri nguji ngena perengka pengerara api pengudah dibantaika chara ti betul ngena perengka nya.