Semua raban diperansang ngatur aktiviti setipak enggau Miri May Fest 2019
Serakup, kelab enggau raban ditu diperansang ngatur aktiviti sepanjai bulan Mei ti deka datai dikena ngelakuka Miri nyadi mengeri ti ‘idup’ enggau palan dagang temuai nyerumba Miri May Fest 2019.
Datuk Bandar Kaunsil Mengeri Miri (MBM) Adam Yii madahka jaku peransang tu mega beserimbai enggau ngintu Miri diangkat nyadi mengeri besai ke- 14 taun kelimpah ngelakuka dagang temuai ditu.
“Program tauka aktiviti nya deka dipasuk dalam kalinda Miri May Fest 2019 dikena ngelakuka iya. MBM deka ngeluarka kalinda nya dalam tengan bulan April 2019.
“Taja pia, pemerat deka diberi ngagai atur program ti nangkup tuju MBM dikena mantaika Miri nyadi mengeri ngelantangka ati sereta ngelakuka dagang temuai ti bisi di Miri,” ku iya nerang.
Aktiviti nya ku Yii patut ngembuan kriteria atur pengawa ngaul penyereta mensia mayuh, main asal tauka seni, lumba, nembiak, muzikal, tanda, lagu, bejualka pemakai, pengawa mandangka dagang, ngaul penyereta beraban tauka penyereta antarabansa, atur pengawa kala diatur sebedau tu ti nerima timbal mensia mayuh sereta pengawa ti setipak enggau tuju ti ulih matak penatai mensia mayuh.
“MBM bisi hak nulak sebarang aktiviti ti enda engkeman sebedau dilis dalam kalinda aktiviti Miri May Fest 2019 nya.
“Kebuah pia, aktiviti ti diterima deka bekenaka lambang Miri May Fest ila,” ku iya.
Ba tuju ngerintai aktiviti dalam kalinda nya, MBM ku Yii ngarapka sida ti bisi ati nyereta ngambika nganjung pulai pom ti ngundan penerang atur pengawa enggau aktiviti ngagai MBM kena tauka sebedau Hari Lima, 22 Mac tu ngambi dikemendar.
Berindik ari nya, raban pengatur ti bisi ati tau nganjung email langgur aktiviti sida nuju ilyanam1@miricouncil.gov. my tauka jeni_ribad0302@ yahoo.com.my.
Sida mega tau nganjung nengah faks nuju lumur 085-435 602 ngambi diperatika Jenifer Leku Balang ba Seksyen Kaul Mensia Mayuh MBM.
Sebarang tanya tau telefon nuju Ilyana Mohamad ba lumur 085-442 428 enggau Jenifer (085-420 215) maya jam opis gawa.