Perintah diansak ngemanahka jalai batang nuju Nanga Dap
Peranak rumah panjai di Nanga Dap ditu ngansak perintah nengeri ngemanahka jalai batang ke suba ti diatu ditengah sida ngelawa genturung pendiau diri.
Kaban Parti Keadilan Rakyat ( PKR) Kanowit, Satu Anchom ti ngarika peranak rumah panjai madah, sida dekaka jalai nya diangkat nyadi jalai batu tekala nya laban diperati ngeruga pengelikun sida ti betengahka jalai.
“Bisi beberapa kali kes penusah bebadi nyadi ba jalai tu.
“Gaya jalai ti jai ngeruga pengelikun sida ti betengahka jalai tu,” ku iya ba penerang berita ensanus.
Kenu ku Satu, seraban peranak rumah panjai ari Nanga Dap udah begempuru ba simpang jalai Nanga Dap ba Jalai Poi/Ngungun kena 8 Februari mantaika pengeringat diri ngagai pengari rayat ti dipilih sida ba sitak nya.
Sida mega udah ngitang kain rentang ba simpang jalai nya.
“Pengari rayat kami baka enda ibuhka penanggul ditapi peranak ba Nanga Dap.
“Dini penunga Kaban Kunsil Nengeri ( ADUN) ngemah, Alexander Vincent enggau Kaban Parlimen (MP) Kanowit, Datuk Aaron Ago Dagang?” ku iya nanya.
Satu mega madahka iya udah ngemai isu tu ngagai PKR Kanowit enggau raban bekuasa bekaul.
Tang dataika sehari tu, ku iya, iya lalu nadai nerima sebarang timbal sentang pekara nya.
“Enti raban bekuasa bekaul suntuk orang gawa, aku empu sedia nyadi pekereja volunteer ngambika gawa matau pengawa nyeleti jalai nya.
“Kebuah pia laban aku nemu sambung jalai ti meruan deka ngemai ubah ba pemansang enggau pengerembai menua tu,” ku iya.