Peranak Long Bedian ningkah pengawa ngempang kompeni batang

Peranak Long Bedian ngenggaika pengawa nyekat serikat batang dipejalaika seraban peranak beberapa hari ke udah.

Ketuai Raban Bansa, Lah Anyie madah, entara kebuah sida ngereja pengawa baka nya laban deka ngulihka sagu ati enggau diambi serikat nya gawa.

“Raban ari genturung pendiau udah nerima bayar ba kerejasama ti manah ari serikat.

“Aku begulai enggau Council of Elders (Komiti Besai) peranak Long Bedian ningkah enggau enda ngaul diri ba pengawa nyekat tu,” ku iya nerangka rambau aum pengarang berita ba sebuah hotel ditu, lemai kemari.

Ku iya, serikat udah dua kali mayar komisen iya nya penyampau RM119,983.90 kena 21 Mac 2018 enggau RM216,763.30 kena 3 Ogos 2018 ngagai akaun Gempung Rama enggau Pengelantang Long Bedian.

Taja pia, bayar diterima pengari ari raban nya.

Ngelansa pasal pengawa nyekat ti udah didiri kenyau ari September 2018 dikena nagang sebuah serikat batang bisi lisin ngemai pansut asil kayu ari Camp Teben ke Logpond Lubok Pinang, Temala.

Serikat batang tu ngambi kayu batang ari kandang Long Bedian baka serikat bukai ti mega gawa ba endur nya.

Sebedau serikat tu gawa, runding udah diatur antara peranak genturung pendiau enggau serikat ke alai siti sempekat udah disain kena 2 Januari 2017.

Kampung Long Bedian diarika ex-Ketuai Raban Bansa, Usung Wan begulai enggau kaban komiti sida nyengkaum pengari ari raban ti ngaga sekat nya.

“Taja kitai enda sepenemu ba siti pekara ukai reti kitai enda ulih bekerejasama ba pekara gempung genturung pendiau.

“Nya kebuah aku minta semua peranak Long Bediau ngambika beserakup enggau bekerejasama ungkup pemaik enggau pengelantang begulai.

Ku Lah, ADUN Telang Usan, Dennis Ngau bejalaika pangku pengawa besai amat kenyau ari pun lebuh sida ngatur randau begulai enggau serikat batang nyentuk sempekat disain.

“Ba sejarah Long Bedian lebih 100 taun, kitai nadai kala napi isu mantaika pengeringat ngagai serikat dataika isu tu nyadi.

Peranak Long Bedian mega milih bekerejasama enggau perintah nengeri Sarawak lalu nyukung ketuai dipegai Kepala Menteri Abang Johari Tun Openg enggau program transformasyen iya,” ku iya nerang.

Peranak meri tabi puji ngagai perintah nengeri ngemansangka genturung pendiau nya ngelama tu.