Peranak Kpg Subak Jaya deka digaga jematan besi ti baru
Peranak Kampung Subak Jaya di Bekenu, ditu ulih senang ati sepengudah perintah nengeri ngemendarka projek ngaga jematan baru dikena nganti jematan lama di genturung pendiau nya.
Kaban Kunsil Nengeri ( ADUN) Lambir Ripin Lamat madah, agih belanja dikena ngaga jematan baru nya udah dikemendar ari baruh Program Transformasyen Menua Pesisir (RTP) enggau penyampau RM200,000.
“Agih belanja udah dikemendar perintah ari baruh RTP lalu kereja ngaga jematan nya ila deka berengkah Mac ti deka datai lalu deka ngena timpuh tiga bulan projek nya tembu,” ku Ripibn madah ngagai Utusan Borneo ditu kemari sepengudah ngabas ke genturung pendiau nya dikena matau palan projek.
Sama bisi nyempulang iya pengari Opis Kereja Raya ( JKR) Sebastian, ketuai komuniti Pemancha Ali Mudin sereta Ketuai Kampung Subak Jaya, Asap Ibrahim.
Nitih ku Ripin, nyema udah tembu ila, jematan nya ti digaga ari besi IBeam, semanjai 12 meter lalu pemesai empat meter deka meri pemaik ngagai lebih 60 iku peranak ti diau di genturung pendiau nya.
“Nya ti nyadi jalai penyambung ngagai peranak di genturung pendiau nya lalu pia mega ulih ngasuh sida mindah enggau likun ba kandang menua nya, enti dibanding enggau jematan ke endang udah bisi diatu ti majak repuk,” ku iya madah baru.
Kelimpah ari nya, ku Asap madah, iya ti nyadi ketuai kaum dia ngarika peranak Kampung Subak Jaya meri terima kasih ngagai perintah nengeri sereta pengari rayat sida, Ripin, laban ti udah siru enggau perengkaguna ungkup peranak ba kandang menua nya.
“Nyema jematan nya tembu ila, kami enda patut irau agi deka mindah lalu kekelut ke genturung pendiau di sepiak nyin, sekalika bejalai kaki, ngena mutusikal tauka entukar,” ku iya ke mega berasai andal enggau pengawa ngaga jematan nya ti berengkah bulan ti deka datai tu ila.
Sebedau tu peranak di kandang menua nya meseti bejejaga, lalu irauka jematan kayu ke lama nya ti baka deka runtuh tauka patah ba sebarang bagi jematan nya laban ti udah enda ulih ditengah utai ti berat.