Anang mudah kena panjuk jaku manis raban orang ti meri kereja begaji besai
Raban nembiak di menua pesisir dilalau anang mudah kena panjuk jaku manis raban orang ti meri kereja di menua tasik enggau gaji ke besai.
Presiden Sarawak Women for Women Society (SWWS) Margaret Bedus madahka ulah ti kurang bejejaga raban nembiak lebih milih kereja enggau orang ke dikelala, nyadi batang kebuah sida ngaul diri ngereja pengawa ke salah ari sukut undang-undang.
“Nembiak kitai patut lebih bejejaga kelebih agi ari menua pesisir enggau rumah panjai lalu anang enda meresa silik nama kompeni ti deka ngambi sida bekereja, ukai semina di menua tasik tang mega dalam menua tu empu.
“Ukai ngulihka penerang ari mulut ke mulut. Ninga ke semaya manis, lalu teparuk. Peresa ba Opis Tenaga Kerja (JTK) saekalika kompeni enggau kereja nya sah,” ku iya lebuh dikerandau ensanus.
Ku iya, apai indai mega patut nentuka anak sida gawa ba kompeni ke berejista tauka sah.
“Apai indai anang enda nemu pasal pengawa anak sida, nama kompeni, endur gawa enggau diau, lumur telefon sereta nama pengaji.
“Ulah ti enda ibuh tau ngujungka kitai ke n yadi apai indai napi penanggul nyema pekara ke enda manah nyadi.
“Nya alai penusah ke nuntung bala anak kita di Kemboja nyadika ajar ukai semina ngagai bala nembiak tang mega apai indai enggau ke bukai,” ku iya.
Margaret bejaku munyi nya ngenang insiden 44 rayat Sarawak ke beumur 21 nyentuk 44 taun ditan ba Jil Banteay Meanchey Kemboja kenyau 11 Disember 2018.
Ku Wisma Putra, sida nya ari 47 rayat Malaysia ke ditan ketegal dituduh nipu, muka sereta ngereja aktiviti judi’online’ ti enda dikemendarka.
Sida tu dipelaba napi penusah ketegal sindiket bedagangka mensia renggat antarabansa.