Yuta nyauka mujur diambika nyadi pemain tim Kuching FA
Pemain tengah Jepun, Yuta Suzuki enda lama agi deka mujur nyadi pemain tim Kuching FA ungkup musim 2019.
Menijar tim, Fazzarudin Abdul Rahman maya ngenuku pekara nya madah, Kuching FA diatu ba proses ngaga pemutus ngambi pemain tengah beumur 28 taun nya.
“Kitai ba proses ngaga pemutus ngambi Yuta tang 99 peratus Kuching FA tetap deka ngambi pemain nya lalu diatu semina nganti atur pindah aja.
“Enti nadai penanggul, iya deka bemain keterubah endar dibai nyatup ATM ba pekit Mangkuk FA kena Hari Enam tu,” ku iya maya pengerami nyuaka baju rasmi Kuching FA ba sebengkah palan bebeli barang ditu.
Nitihku Fazzarudin, nyema Kuching FA setuju ngambi Yuta, pemain nya deka dipelanja penuh kompeni Yakult, pengeluar produk ai irup bepengerai tebilang di Jepun.
Nya alai, iya meri terima kasih penuh ngagai Yakult laban setuju mantu tim Kuching FA.
“Tu pemungkal endur kitai bekerejasama enggau Yakult sereta beratika potensial bukai kitai ulih bekerejasama,” ku tandu iya.
Ngenang pasal pekit musim tu, Fazzarudin nagit nyadi champion ungkup kimpin Liga M3 awak ke sida ulih nyereta Liga Perdana taun deka datai.
Tim tu ku iya, nagit datai ba renggat suku final ba kimpin Mangkuk FA lalu nyadi champion ba pekit Mangkuk FAM.
“Taun tu kitai mayuh ngambi pemain baru ke mayuh peneleba kala ngarika Sarawak baka Joseph Kalang Tie enggau sekeda pemain bukai.
“Aku pechaya gempung pemain baru enggau lama ulih mantu tim tu datai ba renggat ti tinggi agi ba musim tu,” ku iya seraya madahka tim nya udah sedia penuh napi pekit ke deka berengkah enda lama agi.
Fazzarudin mega meri terima kasih ngagai Lea Sport Centre laban ke terus nyukung tim nya kenyau ari suba nyentuk ke diatu.
Enggau peluang tu iya meransang mensia mayuh bela sampal ngemenuhka Stadium Negeri kena Hari Enam tu awak ke meri sukung ngagai tim Kuching FA.
Main Hari Enam tu deka berengkah pukul 3.30 lemai lalu tama nadai bebayar.