Pemujur Bonnie ba pekit Powerlifting Para Mangkuk Dunya balat ngemegahka
Pemujur atlit ‘ para’ menua peranak Sarawak, Bonnie Bunyau ke bulih midul emas ba pekit Powerlifting Para Mangkuk Dunya di Dubai, Emeriah Arab Bersatu kena Hari Minggu nyin tadi, mandangka Sarawak enda suntuk atlit OKU ke bisi penau.
Menteri Pengelantang Pendiau Komuniti, Orang Indu, Ruang Bilik enggau Pemansang Anak Mit, Datuk Seri Fatimah Abdullah madahka Bonnie udah mandangka pengeran ti chukup ngemegahka nyentuk ke nempa pemujur ba renggat entarabansa.
“Kitai berasai amat temeg- ah enggau pemujur Bonnie ke menang midul emas ba Pekit Powerlifting Para Mangkuk Dunya.
“Iya udah mandangka semengat ‘Atlet Para Boleh’, ‘ OKU Boleh’ enggau Agi Idup Agi Ngelaban,” ku iya lebuh dikerandau ensanus.
Ku iya, penyereta Bonnie, ( 18) dalam pekit nya ngambika iya ulih enggau ba Lumba Paralimpik Tokyo ba taun 2020.
Ku iya, dalam pekit nya Bonnie ba penuduk kedua kategori tebuka tang ba awak ke sama iya agi biak dalam kategori berat dipasuk iya nya.
“Dalam kategori nembiak, Bonnie ke pemadu nyulut di dunya diatu,” ku Fatimah.
Bonnie bulih midul emas dalam kategori nembiak lelaki nyentuk 65 kilogram sereta mujur nanggung 190 kilogram pemerat.
Iya ngalahka Heleno Victor Silva ari Brazil (115 kilogram) ba lumur dua lalu midul engkeraju dimenangi Beom Jo Seo ari Korea Selatan nengah rikod 98 kilogram.
Bonnie mega bulih midul pirak dalam kategori senior enggau penyampau berat ke ditanggung iya sebaka enggau kategori ke siti tadi.
Emas dimenangi atlit Algeria, Hocine Bettir ( 191 kilogram) lalu engkeraju dimenang atlit Jordan, Mohammad Tarbash (181 kilogram).