Abang Johari, bala ketuai nengeri meri basa kepenudi ngagai niang Dato Andrew

Kepala Menteri Datuk Patinggi Abang Johari Tun Openg udah datai meri basa kepenudi ngagai niang Ex- Sapit Chairman Opis Kaunsil Sibu ( SMC) Dato Andrew Wong Kee Yew ba Nirvana Memorial Park, Jalai Sibu- Bintulu ditu, pagi kemari

Penatai iya maya tu disempulang Sapit Kepala Menteri Datuk Amar Awang Tengah Ali Hasan, Menteri Dagang Temuai, Seni, Main Asal, Nembiak Lumba enggau Main, Datuk Abdul Karim Rahman Hamzah enggau Menteri Perintah Menua enggau Pengawa Berumah Datuk Dr Sim Kui Hian.

Kelimpah ari nya Menteri Pelajar enggau Pemansik Sains Dr Annuar Rapaee, Menteri Muda Perengka Pengangkut Datuk Dr Jerip Susil enggau Chairman SMC Datuk Tiong Thai King sama bela datai.

Abang Johari enggau bini iya Datin Patinggi Datuk Jumaani Tuanku Bujang maya tu bela betemu enggau apai enggau indai niang iya nya Menteri Wang II Dato Sri Wong Soon Koh enggau Datin Sri Pauline Leong Poh Lin.

Mensia mayuh sereta bala kaban belayan mega bela datai meri basa kepenudi ngagai niang.

Nambahka nya, Tuai Megai Menua Tun Pehin Sri Abdul Taib Mahmud dilanggur deka meri basa kepenudi ari iya lemai legi.

Niang 44, ti semina siku anak lelaki Soon Koh ninggalka dua iku anak enggau bini.