Bekerejasama ngambika pengawa nyukat perimeter NCR mujur dipejalaika

Peranak di Krokong, Tringgus enggau Gumbang numbuhka tim perimeter survei tanah Hak Adat Bumiputera (NCR), ke nyadi siti ari chara dikena ngulihka surat pala tanah sida ari baruh Seksyen 18, Kanun Tanah Sarawak.

Ku Kaban Kunsil Nengeri ( ADUN) Serembu, Miro Simuh, tanggungpengawa tim nya beguna amat lalu peranak ari ketetiga genturung pendiau nya meseti meri kerejasama dikena nentuka kereja nyukat perimeter tanah NCR sida mujur dipejalaika.

“Tu titik pemun dikena nentuka tanah kita diakun ari baruh Seksyen 18 Kanun Tanah Sarawak, iya nya ungkup lot individu.

“Nya alai, patut amat kita bekerejasama nentuka pengawa nyukat nya enda dikachau lalu tembu ba timpuh ke ditetap,” ku iya lebuh ngelancharka Program Perimeter Survei ungkup kandang menua Krokong, Tringgus enggau Gumbang di Kpg Pedaun Bawah, ditu kemari.

Ku iya baru, pengawa nyukat perimeter nya dijangka tembu Julai tu lalu deka dianjung ngagai Opis Tanah enggau Survei ngambika didokumentasika.

“Aku amat ngarap ngambika perimeter survei ditu mujur, enda baka ba endur bukai ke ditangguh laban nadai kerejasama ari peranak di menua nya,” ku iya.

Iya mega ngarapka komitmen ti dipandangka peranak ari ketetiga endur nya, ba pengawa ngintu tanah sida.

Ku iya baru, pemesai Opis Tanah enggau Survei mega deka dikangau datai pengudah pengawa nyukat perimeter nya tembu, ngambi nerang ngagai peranak menua nya sentang pengawa ngeluarka surat pala tanah ari baruh lot individu.

KE PENGINGAT: Penghulu Joryim Ngayop (lima kiba) menyerahka pek kayu tebelian ngagai Miro (tujuh kiba) ke nyadi kelai ngelancharka Program Perimeter Survei ungkup Krokong, Tringgus enggau Gumbang.