Komiti khas mansik perambu ngangkatka Siburan nyadi pelilih menua deka ditumbuh
Siti komiti khas deka ditumbuh dikena mansik perambu ngangkatka Siburan nyadi pelilih menua.
Kepala Menteri Datuk Patinggi Abang Johari madah komiti khas nya deka betuaika Sekretari Perintah Negeri Tan Sri Datuk Amar Mohamad Morshidi Abdul Ghani enggau Residen Serian Jonathan Lugoh.
Iya madah dikena ngangkatka status Siburan ari pelilih mit ngagai pelilih menua patut bisi sekeda kriteria enggau sukut patut ditangkup.
“Perintah nengeri deka berundingka langgur penemu ngangkatka status Siburan ari pelilih mit ngagai pelilih menua.
“Taja pia sekeda kriteria enggau sukut patut ditangkup dulu sebedau Siburan ulih diangkat nyadi pelilih menua enggau tuju nya aku deka ngasuh komiti khas betuaika Sekretari Perintah Nengeri enggau Residen Serian ditumbuh, awak mansik langgur penemu tu,” ku iya.
Iya madah munyi nya rambau pengerami bejadika Gelanggang Bola Keranjang Siburan enggau Nyambut Taun Baru China (TBC) 2019 ditu, kena malam Hari Tiga tu tadi.
Ba pengerami nya, Abang Johari mega bisi nyuaka pemeri TBC ngagai 40 penerima nyengkaum orang tuai enggau orang kurang pemisi ba sitak Siburan.
Abang Johari madah perambu silik patut digaga ba sukut pemansang infrastruktur enggau pengereja pengawa nyema Siburan deka diangkat nyadi pelilih menua.
Kelimpah nya ku iya, Siburan bepenau mansang nyadi mengeri baru laban udah mandangka pemanah ba sukut sosioekonomi.
“Aku ngasaika Siburan deka nyadi mengeri baru tang iya ke beguna amat meseti bisi palan gadung tauka taman rekreasyen digaga ditu ke pemaik mensia mayuh.
“Aku sedia meri agih belanja dikena numbuhka palan ga- dung tu. Aku minta Datuk Dr Jerip (Kaban Kunsil Nengeri Mambong ) madah aja ngagai aku nama ke diguna enti udah bisi taba,” ku iya.
Abang Johari mega bisi ngemendarka agih belanja RM1.5 juta dikena ngemanah Opis Pelilih Mit Siburan.
Dulu ari nya, Dr Jerip ke mega Menteri Muda Perengka Pengangkut, madah peranak menua nya bisi ngenataika pinta ngasuh Siburan diangkat nyadi pelilih menua.
Iya madah tu seriris enggau pemansang ke majak mayuh digaga ditu.
“Enggau penambah atur pengawa, mayuh pekara enggau servis ulih disedia enggau ditambah agi,” ku iya.
Ngelansa pasal Gelanggang Bola Keranjang, Dr Jerip madahka nya digaga ba taba gelanggang bola keranjang enggi Gerempung Bola Keranjang Siburan ditumbuh taun 1975.
Suba palan tu dikumbai ‘Hammer Area Basketball Association (1965-1970an) diberi nama beserimbai enggau Operasyen Hammer bekau Balai Polis di Batu 18 Jalan Kuching-Serian diserang penyelawai kominis kena Jun 1965.
Palan tu nyadi endur bala pemesai sereta polis betemu dibaruh pegai Ketuai Polis Diraja Malaysia ( PDRM) maya nya Sir Claude Fenner.
“Siti agi kelai besai ba Siburan iya nya Gelanggang Bola Keranjang ke pemaik bala nembiak.
“Projek tu asil ‘pejalai gawa kena 2016 digaga ex-Menter Besai (Datuk Seri Najib Tun Razak maya nya iya ngemendarka tiga projek.
“Keterubah, Gelanggang Bola Keranjang ke udah tembu tu, enggau ungkus RM500,000, Pasar Tamu Siburan enda lama agi tembu enggau ungkus RM1 juta sereta Klinik Pengerai Siburan ba taba baru, belakang Keda Besai Eastern, diatu ba rengga tinda,” ku iya.
Sama bisi datai Menter Pelajar, Sains enggau Pansik Teknologi Dato Sri Michae Manyin, Menteri Dagang Temuai, Seni, Main Asal Nembiak Lumba enggau Main Datuk Abdul Karim Rahman Hamzah enggau Menteri Muda Nembiak enggau Lumba Datuk Snowdan Lawan.