Produk tusu baka yougart, UHT enda ditagang diimpot tama ke Sarawak
Produk tusu baka yougart enggau UHT enda ditagang diimpot tama ke Sarawak nengah notis ngetuka impot tusu baru (tusu segar) tama ke Sarawak.
Sapit Kepala Menteri Datuk Amar Douglas Uggah Embas madah notis nya semina diterit ba tusu baru aja.
“Kitai deka nerangka notis tagang tu enda diterit ba produk yougart, UHT enggau produk susu ke bukai.
“Ba sentang tusu baru, produk tu meseti nitihka penetap Opis Servis Veteriner Sarawak alai tu nyadi sebengkah ari atur kitai nyaga Sarawak ari sakit kaki enggau mulut.
“Kitai deka nentuka semua produk enda ngasuh sakit tu ngelekai alai Sarawak sigi udah diseliah ari sakit tu,”ku iya.
Uggah mansutka penerang nya ngagai pengarang berita pengudah nerima penemuai basa raban ari sebengkah kompeni pengimpot produk tusu di Wisma Bapa Malaysia ditu, kemari.
Uggah ke mega Menteri Betanam Betupi Moden, Tanah Adat enggau Pemansang Kandang Menua madah sebarang atur ngimpot tusu baru tama ke Sarawak meseti dulu diperunding enggau Opis Servis Veteriner Sarawak (JSVS).
Ku iya, sebarang pengawa ngimpot tusu baru meseti dulu nitihka penetap sebedau ulih dibai tama.
Notis tagang ke dikeluar kena 4 Februari 2018 disain Direktor JSVS Dr Adrian Susin Ambud.
Nengah notis nya, tusu baru ari menua ke bisi napi sakit kaki enggau mulut (FMD) ditagang dibai tama ke Sarawak.
Sarawak udah diseliah ari FMD kenyau ari taun 2004 alai perintah diatu keran nentuka sakit nya enda agi ngelekai ditu.
Ngenang kaul ke sama, stokis besai ari FreshFarm, Alex Khoo lebuh dikerandau tembu pengawa kemari madah berasai lantang ketegal UHT enggau produk tusu bukai enda disengkaum ba notis tagang nya.
Tajapia iya madah kompen udah nganjung surat pinta enggau surat penerang ngagai JSVS ngambika ulih ngimpot tusu baru ke Sarawak.
“Pinta udah dianjung lalu diatu benung diperunding reti nya impot susu baru tu mengkang diketu ba maya ke diatu.
“Tang kitai udah ngenataika pinta, aku ngasai opis veteriner deka meri pemutus sentang pekara tu,”ku iya.
Bela ngulu randau Sekratr Mendam MANRADE, Datu Ik Pahon.