Sekeda bagi jalai ba Km 1.5 nuju ke SK Nanga Bon ampuh bah ketegal ujan enda ngengetu
Sekeda endur ba jalai pemanjai Km1.5 nuju SK Nanga Bon di Kemuyang ditu udah diampuhka ai ketegal ujan ke enda ngengetu beberapa hari ke udah.
Nengah perati The Borneo Post mua ke lemai kemari, gaya ampuh bah nya dipeda bisi surut. Sekula sekondari mega dipeda meraka ampuh bah nya (nuju ke SK Nanga Bon) mulaika diri ke rumah.
Ke rikod, dia bisi dua buah rumah panjai iya nya Rumah Tingang enggau Rumah Lawrence.
Kena pagi ensanus, tikas tinggi agi, semina ulih ditengah orang ti bedarat engagu entukar ke besai.
Sekula primari ti ngembuan 60 iku nembiak nya,dibuka baka selama laban apai indai nguluka anak sida nurun besekula.
Chairman Gerempung Apai Indai enggau Pengajar ( PIBG) SK Nanga Bon, Junah Sungo ngarapka opis ke bekaul nambahka peninggi jalai nya.
Iya beratika maya musim ujan, sekeda endur ba jalai nya ampuh bah ti lalu ngenusah nembiak nurun besekula.
Ku Junah, tikas ai ba jalai semak rumah panjai nya tinggi agi ensanus lalu penanggul nya nyadi ninting taun.
Chairman Opis Pelilih Menua Pesisir Sibu (SRDC) Sempurai Petrus Ngelai lebuh dikerandau, madahka endur ba KM 1.5 SK Nanga Bon ampuh ketegal ujan bangat beberapa hari ke udah.
“Kandang jalai nya udah ditambah peninggi opis kaunsil nya tang ba sekeda endur mengkang ampuh maya hari ujan bangat eng- gau ai ke melema ari Sungai Bon. Kaunsil udah nganjung ripot pasal gaya ampuh bah nya ngagai opis Residen Sibu nengah Komiti Mutar Penusah Ngenyit Bagi Menua Sibu.
“Kami deka bekerejasama enggau ejensi lalu meri barang bagi bantu nyemaka jala nya enda ulih ditengah,” ku Sempurai.