SWP: Kena rizah nengeri ngemansangka pelilih menua ti dikumbai pemadu seranta di nengeri tu

Parti Pekerja Sarawak (SWP) minta Kepala Menteri Datuk Patinggi Abang Johari Tun Abang Openg beratika tujuh pelilih menua ba nengeri tu ti dikumbai ke pemadu seranta.

Presiden iya Munan Laja madahka siti ari pelilih menua nya iya nya Song.

“Aku meri langgur penemu ngambika perintah nengeri ngena sebagi ari rizab nengeri dikena nge- mansangka pelilih menua tu nyengkaum pelilih Song,” ku iya nengah penerang berita ditu, kemari.

Ku iya, pelilih Song bisi 160 buah rumah panjai enggau penyampau peranak manggai 53,687 dalam taun 2005 tang penyampau nya nurun ngagai 20,046 dalam taun 2010.

“Pelilih Song enti dipeda kitai nadai mayuh berubah ba infrastruktur nyengkaum pemansang ke bukai.

“Kitai pechaya nya kebuah iya dirintai antara pelilih menua ke pemadu seranta ba menua tu,” ku iya nampung.

Ambika chunto ku iya, Jalai Takan nadai entu mansang lalu meruan baka selama gaya jalai iya, baka tujuh taun ke udah.

Ku Munan, pelilih Song nadai mayuh berubah kenyau ari suba.

Pengudah dibantai nyadi antara pelilih menua ke pe- madu seranta ba menua tu, ku iya, mayuh peranak Song nanya nama pengawa udah dikereja perintah ba pelilih menua nya laban sida pengundi perintah ke diatu kenyau ari kelia.

“Pekara ti nyadi tanda tanya, peranak Song ti ngundi perintah nengeri diatu tang sida alit ati, nyadi perintah ti bisi belanja, nama kebuah pelilih menua sida enda dikemansang baka pelilih menua bukai,” ku iya madah nyemetak.

Tambah mega ku iya, pekara ti deka dipeda sida iya nya pengawa ngemanah Jalai Takan ti diatu semina digaga naka Nanga Bajor aja.

“Enti ulih, Jalai Takan tu tau disambung agi ke Ulu Katibas lalu anang ngetu naka Nanga Bajor aja.

“Enti bungkur jalai tu besa agi, mayuh pemansang buka ulih tama ari pemisi sambung jalai alun tu,” ku iya.