SK Sg Sebatu menggi gelar champion MSSR renggat Pelilih Subis

Sekuka Primari (SK) Sungai Sebatu udah mantaika penyulut sida dalam lumba enggau main sepengudah ngalahka 43 buah sekula dalam karnival Majlis Sukan Sekolah Rendah (MSSR) Pelilih Subis ti diatur di Stadium Miri, kemari.

Sekula nya ukai semina udah menggi gelar champion ti ngumpul 159 poin ti datai ari lapan midul emas, tujuh pirak enggau empat engkeraju, tang mega nembiak ti ngarika sekula nya Patrick Nawan udah digelar atlet ti pemadu nyulut.

Patrick udah meri dua midul emas nengah pekit belanda individu 200M enggau ‘lompat jauh’ lalu dua agi midul emas dalam pekit belumba begintir 4x200M enggau 4x100M.

Ba penuduk lumur dua diempu SK Batu Niah enggau 137 poin nengah lapan midul emas lalu tiga midul pirak enggau engkeraju. Pia mega nembiak ti ngarika sekula nya Geneviene Mbang Rimong ti udah nyulut ketegal ti meri dua midul emas dalam pekit ‘lompat jauh’ enggau 100M lalu midul emas siti agi iya nya ba lumba 4x100M.

Nangkan ke nya, SK Kampung Tegageng udah ba penuduk lumur tiga enggau 99 poin nengah empat midul emas, lima pirak enggau tiga engkerajuk.

Perais udah disuaka Kaban Parlimen (MP) Sibuti Lukanisman Awang Sauni enggau Pemesai Pelajar Pelilih Subis Seripah Azizah Wan Hussain.

Ba pengerami nya, Lukanisman udah madahka deka meri agih belanja sepenyampau RM10,000 ngagai MSSR Pelilih Subis.

Sepenyampau 769 nembiak ari 44 buah sekula ba pelilih Subis ngambi bagi dalam pekit lumba enggau main ti diatur dua hari berunggu nya dikena milih pengari ke MSSR renggat Bagi Menua Miri ti deka dipejalai kena 5 Mac ti deka datai.