Simoi udah ngemendar geran perintah RM10,000 ungkup PIBG SMK Lingga

Geran penyampau RM10,000 diberi ngagai Serakup Apai Indai enggau Pengajar (PIBG), Sekula Sekondari (SMK) Lingga dikena ngatur program enggau aktiviti ninting taun sekula nya.

Kaban Kaunsil Nengeri (ADUN) Lingga, Simoi Peri madahka geran nya dikena nyaup wang turu PIBG ngatur aktiviti sekula sepanjai taun tu.

“Aku ngarapka geran ti diberi ulih dikena memanah ngatur bemacham aktiviti ti ngaul pekara pelajar ba sekula tu,” ku iya lebuh bejaku ba Pengawa Nyuaka Geran ba sekula nya pagi kemari.

Ku Simoi nambah, semina SMK Lingga aja sekula sekondari ba sitak DUN Lingga ti berengkah gawa ujung bulan Jun 2018 lalu penyampau tubuh nembiak bisi 305 iku.

“Tebal agi bala nembiak besekula ditu datai ari sitak Lingga, Stumbin, Tanjung Bijat, Banting sereta beberapa gentu- rung pendiau ti besemak Sri Aman.

“Ari pemisi SMK Lingga tu ulih ngurangka penyekut bala nembiak ba beberapa buah sekula sekondari ba Sri Aman nyengkaum SMK Saint Luke, SMK Simanggang, SMK Sri Aman enggau SMK Melugu,” ku iya.

Sama datai Sapit Chairman Pampang Parti Pesaka Bumiputera Bersatu (PBB) Pampang Lingga, Mohd Yusuf Lugom sereta bala pengajar kanan bukai.