PKPIS sitak Julau sereta Pakan udah ditumbuh enggau rasmi
Gerempung Pengintu Pengelantang Betanam Betupi Iban Sarawak (PKPIS) Pampang Julau enggau Pakan udah ditumbuh enggau rasmi bedau lama ti udah.
Nengah penumbuh pampang nya, komuniti di kandang menua nya deka ulih bekerejasama dalam PPKIS dikena ngemansngka diri ba sektor betanam betupi.
Berindik ari nya, Elly Lawai Ngalai udah dichiri nyadi Ketuai PKPIS Pampang Julau enggau Pakan lalu mandal iya nya Sendar Sabang.
Beserimbai enggau pemisi komiti ba pampang nya, PKPIS andalka pengawa nyiri kededua chalun nya ulih ngemansangka sektor betanam betupi di kandang menua ari baruh pegai seduai.
Ari mayuh visyen enggau misyen baru dalam sektor betanam betupi, PKPIS pampang nya deka nyadi pampang ti relevan lalu mega bisi ngembuan produk betanam betupi kediri.
Kelimpah ari nya, kandang menua Julau enggau Pakan endang aktif enggau produk Lada Chelum sereta mega Lada Burak.
Ba kaul nya, Dewan Majlis Tertinggi ( DMT) PKPIS pampang nya komited dalam mantu komuniti di kandang menua nya ngelakuka produk nya di makit ba renggat ti tinggi agi.
Berindik ari nya, lebuh ti ditanya pengarang berita bekaul tunga kuing PKPIS di pampang nya, Elly madahka nengah tanggungpengawa ti udah dilemapai ngagai iya ba renggat nengeri, iya deka bebendanr mantu komuniti di Julau enggau Pakan.
“Nengah pengandal ti udah dilempai DMT PKPIS Renggat Nengeri, aku enggau naka ulih mantu komuniti di kandang menua Julau sereta Pakan dalam sektor betanam betupi.
“Raban PKPIS pampang nya mega deka bebendar ngiga peluang ngelakuka produk ke renggat menua luar ungkup produk Lada Chelum enggau Lada Putih lalu pia mega enggau produk sawit.
Lebuh ti ditanya bekaul projek betanam betupi ti deka ditumbuhka iya ba Jualu eng- gau Pakan, Elly madahka juluk iya deka nyadika kededua kandang menua nya nyadi sebag ari palan ngeluarka produk ikan sangkar.
“Mayuh langkar ti udah digaga aku lalu aku mega ngarap ngambika DMT PKPIS deka ngemendarka projek nya lalu entara ti ulih aku padah ditu iya nya nupi ikan dalam sangkar,” ku iya nambah.
Aum numbuhka pampang nya digaga ba Julau lalu sama bisi digulu Chairman PKPIS Bari Ubai, Direktor PKPIS Nengeri Sarawak Jocky Jim Ungka sereta kaban DMT ke bukai.
Nuju semua peranak d kandang menua Julau enggau Pakan ti ingin deka nyadi kaban PKPIS tau ngiga terus Elly.