Kelas nebah belikan deka diajar ba ASADIA dalam taun tu
Tebah ari perengka muzik Belikan deka nyadi siti agi main asal Iban ti deka diajar Akademi Serakup Dayak Iban Sarawak (ASADIA) ba taun 2019 tu.
Nitihka penerang Ketuai ASADIA Mabong Unggang, program ngenan sereta ngangkatka main asal nya deka dilanchar ba bulan Mei 2019 tu.
“Belikan sebengkah perengka muzik tradisional bansa Iban ke sebaka sape ke alai muzik ari belikan tu udah lama enda ditebah.
“Pengawa ngelanchar program tu deka dikemujur Menteri Muda Nembiak enggau Lumba Datuk Snowdan Lawan ke mega Kaban Kunsil Nengeri(ADUN) Balai Ringin,’ku Mabong.
Berindik enggau nya, iya ngelalu mensia mayuh sama bela datai ngerami program nya.
Sebarang tanya tau dikenatai ngagai iya(Mabong)nengah lumur 012-6925562.
Kelimpah ari nya, pengawa ngerami raban pematih ke udah mujur nembuka kelas main asal ASADIA ungkup taun 2019 deka mega diatur.
Ku iya, ba pun taun 2019 ASADIA ngatur kelas kuntau enggau kelas ajat indu Iban.
Penyampau 17 iku orang bisi ngulu kelas ajat indu Iban lalu 7 iku ngulu kelas sape.
‘Entara kelas bukai ke deka diatur iya nya kelas gendang pampat, nusuk marik enggau ngaga manik empang tauka perengka ngias baju indu Iban,’ku Mabong.