Henry Kanyan mujur dipadu nyadi chairman MJKKK di Sekuau ungkup penggal ke-2
Henry Kanyan sekali agi dipadu nyadi chairman Kaunsil Komiti Pemansang enggau Pengelikun Genturung Pendiau (MJKKK) di Sekuau ungkup penggal ke-2 pengelama tiga taun.
Nitih penerang, Henry dipilih nyadi chalun mangku tanggungpengawa chairman MJKKK lalu menang darat ba pengawa diatur kena 10 Febuari tu tadi.
Sebedau Henry, pangku penuduk chairman MJKKK Sekuau dipegai Penghulu Ngalai. Taun tu, bala tuai rumah enggau kaban exco udah mantaika langgur penemu minta penuduk nya dipilih nengah chara undi.
Henry ngembuan Master Degree dalam bidang Dagang enggau Pengereja Pengawa udah mujur mandangka penau diri nyadi ketuai ba pelilih Sekuau kenyau dua taun ke udah.
Entara pemujur digaga iya begulai enggau MJKKK iya nya minta projek ari ADUN Tamin dikena nyungkur taba rumah panjai baru, nyungkur taba genturung pendiau Islam di Sekuau, ngasuh rumah asap di sitak Sekuau, ngempuruka ekonomi rayat nengah ADC Batang Oya, Sekuau enggau Pakoh.
Nangkan nya, ngatur seminar ketuai raban bansa ungkup MJKKK, minta belanja ari SRDC dikena ngemanah jalai alun nuju skim Sekuau, ngatur program ungkup orang indu nengah exco indu MJKKK enggau mayuh perambu bukai ke deka digaga udah tu.
Nitihka penerang mega, Henry enda ngadang diri dipilih sereta enda disatup orang ngerebut penuduk mangku pengawa nya laban sebedau pengawa bepilih, mayuh pekara nyadi nyengkaum dua ripot po- lis digaga bekaul enggau MJKKK Sekuau sekumbang ke diiring iya.
“Aku enda ngadang tau menang nadai orang ngelaban laban beratika pekara nya enti nitih patut bisi pengawa bepilih,” ku iya.
Berebak enggau nya, Henry meri terima kasih ngagai pemujur pengawa nya sereta meri terima kasih ngagai semua ke udah meri sukung ngagai iya terus ngiring MJKKK Sekuau.
Kandang menua ke dijaga MJKK Skim Sekuau mungkur sitak Ulu Oya, Batang Oya, Pakoh enggau Sekuau lalu bisi 64 JKKK rumah panjai enggau 64 iku tuai rumah ari baruh komiti tu.
“Enti suba, MJKKK semina ngatur rayat ba sitak Sekuau tang diatu pengawa tu deka dikerembai nyentuk ke menua pesisir baka di Ulu Pakoh enggau Ulu Oya,” ku Henry.
Berebak enggau nya, Henry madah MJKKK Skim Sekuau ukai baka gerempung tauka serakup besai tu dipadahka meseti direjista ba Opis Pengerejista Gerempung (ROS).
“Naka ke diatu nadai dirintai dalam ROS patut ngerejista sebarang JKKK. Tambah mega, MJKKK tu dikemata opis pelilih ke nyadi penyanding penemu lalu iya nyadi komiti khas mantu perintah ngatur peminta rayat awak ke tetiap penanggul ke ditapi lengkas diputar.
“Serak tu, aku ukai besemaya tang deka gawa begulai ngereja pengawa ke pemaik mensia mayuh. Pia mega, Penghulu Ngalai deka dikangau kitai baru awak ke nyadi penyanding penemu komiti tu,” ku iya seraya madah enda lama agi deka mantaika nama exco baru ungkup penggal baru.