DTTAS chakah ngatur program nyungkak penatai pemisi Dayak
Gerempung Pemikir Dayak Sarawak ( DTTAS) diatu udah ulih chakah bejalaika mayuh macham aktiviti enggau program ngagai pengawa ngemansangka komuniti Dayak nengah pekara pelajar, pengelandik sereta idea ti chukup manah ke udah dipansutka ari raban profesional enggau intelektual Dayak.
Presiden DTTAS Elias Lipi Mat madah DTTAS diatu udah ulih berasai lantang sepengudah peminta sida ngerejister gerempung nya udah dikemendar Opis Ngerejister Gerempung ( ROS) kemari.
“Diatu DTTAS udah nyadi siti Gerempung Ukai Dikuasa Perintah (NGO) ti bepelasarka komuniti Dayak ke sah nitihka undang-undang lalu kitai deka nyingkang nitihka polisi ke udah ditetapka, sereta ngetanka misyen enggau visyen DTTAS,” ku iya madah ngagai Utusan Borneo ditu kemari.
Elias ti nyadi ketuai komiti DTTAS ti datai ngambi setipikit enggau polisi DTTAS ke udah dikemendar, ba opis ROS bagi menua Miri kemari.
Ku iya, DTTAS ditumbuh enggau tuju negika pemerat komuniti Dayak, ngadaka servis ti enda bechiping, nyukung ngagai pemansang enggau ngangkatka tikas pengidup komuniti Dayak.
“Kitai ngarapka ulih ngintu penyelai main asal, pengelantang pendiau, pemerat sereta hak, nentuka nadai agi orang ti seranta sereta ngemanah status sosioekonomi enggau nyapai meisyen nengah pelajar, pemansang polisi sereta proses pekara undang-undang,” ku iya.
Pia mega, DTTAS mega sama ngansak ejensi perintah ti bekaul mantu nembiak sekula bansa Dayak ti nyulut dalam pemutus ba akademik tang kurang belanja dikena nampung pelajar ke renggat ti tinggi agi.
“Tu ulih mantu sida ti ulih sereta ngembuan pengelandik ngambika ulih terus nerima peluang besemekih lalu mujur dalam akademik sereta nentuka sida enda tinggal.
“Enggau tu, kitai ulih ngadaka raban nembiak rebak baru ti bisi penemu lalu ulih dalam nyapai standard profesionalisme,” ku iya nambah.
DTTAS sebedau ti berejister enggau ROS disebut Tim Pemikir Dayak tauka Dayak Think-Tank Group ( DTTG) ke endang udah ditemu enggau pengawa sida ti bebendar negika hak sereta bejalaika pengawa pengasih mantu komuniti Dayak, kelimpah bekerejasama nyukung pengawa NGO Dayak ke bukai.
Penengkebang DTTG sebedau tu Wellie Henry Majang, ke diatu nyadi penyanding penemu DTTAS madahka Miri deka nyadi indu opis gerempung nya, lalu diatu sida ngelangkar deka ngerejister kaban ari selampur nengeri Sarawak sereta deka terus numbuhka komiti mit di tetiap kandang menua ngambi uih ngemuntangka sida.
DTTAS ti udah baum ba Pustaka Miri kena bulan nyin tadi, udah seati nyiri komiti protem sereta kaunsil penyanding penemu diekan ngemuntangka proses ngerejister nya diatur.
“Sepengudah dikerandau lalu nyapai konsensus ti deka datai, kitai nganjung peminta rasmi ngagai ROS, berejister nyadi sebuah gerempung lalu ngena nama Gerempung Pemikir Dayak Sarawak tauka Dayak Think-Tank Association Sarawak (DTTAS).
“Komit nya datai ari sida t profesional baka luyar, lutur akauntan, direktor, pengelicha, orang dagang, orang ekonomi, injinir, direktor ba sektor korporat sereta mayuh agi,” ku iya seraya madahka terima kasih ngagai sukung enggau kerejasama ti udah diberi komiti tim (DTTG) nya ngelama tu, ti bebendar nentuka pengingin numbuhka DTTAS nyadi nyata,” ku iya nambah.