ADUN Padungan melabaka diri ditagang ngulu aum DUN Mei tu
Kaban Kunsil Nengeri (ADUN) Padungan Wong King Wei nyadang diri ditagang ngulu aum Dewan Kunsil Nengeri ( DUN) ti deka datai.
Wong madahka pemutus nagang iya ngulu aum ke diatur ba bulan Mei nya bepelasarka perambu ‘Jawatankuasa Hak Keistimewaan DUN’ ti ngadu sesi mendingka kes kemari.
“Ari peneleba ke udah, semua kaban kunsil nengeri ari sepiak penyakal ke dipechara ngagai Jawatankuasa Hak Keistimewaan DUN ditagang ngulu aum DUN pengelama 6 bulan tauka 12 bulan.
“Ketegal nya aku nyadang diri nerima nasit ke sama, baka sida niang Wong Ho Leng, Violet Yong (Pending) nyengkaum Chong Chieng Jen (Stampin). Semina ditagang nitihka timpuh ke ditetap, kitai enda nemu, kitai nganti pemutus DUN,”ku iya.
Iya mansutka jaku nya lebuh dirandau pemberita pengudah ngulu sesi mendingka kes Jawatankuasa Hak Keistimewaan DUN ditu, kemari.
Wong madah, Jawatankuasa Hak Keistimewaan DUN semina deka mantaika perambu bengkah ukum ti deka diterit ngagai DUN pengudah mansik semua bukti enggau penerang ke bekaul.
“Komiti tu nadai kuasa ngaga pemutus, tang semina meri perambu ngagai DUN Sarawak pengudah mansik semua bukti,’ku iya.
Wong madah, sesi mendingka kes nya digaga baka ke dibai ngagai DUN ti dipun Speaker DUN Datuk Amar Mohd Asfia Awang Nassar kena 12 November 2018, pengudah iya nuduh Asfia enda lurus maya ngintu pejalai DUN.
Iya madah, bengkah jaku ari iya bekaul enggau ulah speaker ngelama tu ti enda kala ngemendar mosyen kaban kunsil nengeri ari sepiak penyakal dipejuraika dalam DUN.
“Aku madah Speaker seruran chukup kreatif ngiga dalih enggau kebuah nulak mosyen ke dibai penyakal lalu nyaga eksekutif (menteri) ari ke nyaut tanya kaban kunsil nengeri penyakal ba sentang sekeda isu.
“Pekara ke disebut aku nya ngasuh speaker ringat lalu madahka aku nuduh iya enda lurus,’ku Wong.
Taja pia Wong enda arapka sesi mendingka kes kemari laban chairman ke mega Speaker DUN (Datuk Amar Mohd Asfia Awang Nassar) enda datai.
“Sebedau sesi nya berengkah aku enda arapka pejalai sesi ketegal chairman, iya nya speaker DUN enda datai. Semina enam ari tujuh komiti aja ke datai.
“Nengah Perintah Tetap 73 (6), DUN Sarawak madah sesi mendingka kes ulih diatur enti bisi empat iku kaban komiti datai alai siku meseti chairman. Reti nya sesi tu enda sah ari sukut undangundang.
“Aku mega ngelaban pengamat kes laban maya aum DUN kena 12 November 2019 nadai mosyen ke nyengala entap mai aku ngagai komiti nya.. Pengudah speaker bejaku iya mega lalu muka undi ngambika aku dipechara ngagai komiti tu,’ku iya.
Wong madah baka ke suah tetiap mosyen ke dibai ba dewan meseti dipelabanka penemu dulu ngambi sida ke dituduh diberi hak ngenanka diri.
Berindik enggau nya, iya ngasai Asfia meseti diganti enggau orang bukai ngambika DUN Sarawak lebih agi demokratik lalu pekara nya ulih dikemujur nengah chara nukar perintah Sarawak.
Asfia ku iya, udah ba penuduk nya kenyau ari taun 2000.