Masuk latih ke bisi disedia tauka pilih kereja ba palan ke menyana: Fatimah
Peranak Sarawak ke baru lepas ari rumah jil Provinsi Bantaey Meanchey, Poipet tunga ke barat Kemboja kelebih agi sida ke agi biak dilalau ngulu latih pengelandik ke bisi disedia di nengeri tu.
Menteri Pengintu Pengelantang, Komuniti, Orang Indu, Ruang Bilik enggau Pemansang Anak Mit Dato Sri Fatimah Abdullah madah, entara sekeda palan ke manah iya nya Pusat Kecemerlangan Teknikal Sarawak(CENTEXS).
CENTEXS ku iya, nyendia mayuh bengkah kus pengelandik ke diberi ke enda bebayar ngagai rayat nengeri tu kelebih agi ungkup raban nembiak enda ngira ikas akademik seagi sida ulih macha enggau nulis.
“CENTEXS ngembuan rikod manah ke alai 90 peratus ari sida ke belatih dia udah bulih kereja ti ngipakka pengelandik diri.
“Mayuh kus disedia setipak enggau pinta pengawa puang baka kelas nyumai lalu ukai semina disedia ba CENTEXS tang ba palan bukai mega,’ku iya.
Fatimah mansutka jaku nya lebuh dikerandau di Muzium Ranee di Begunan Kort Lama ditu, kemari.
Ungkup sida ti milih deka bekereja, iya ngelalau raban nya nyengkaum bala nembiak ke bukai ngambika kereja ba palan ke menyana lalu bejejimat enti bisi disedia kereja ke enda temu pengamat.
Ditanya sentang pengawa ke deka dikereja udah tu ba sentang kes nya, Fatimah madahka tuju sida (Perintah Sarawak) semina mai pulai semua ke ditan di kemboja nyengkaum sekeda peranak Sabah enggau Semenanjung Malaysia.
Ku iya, atur bukai dilempaika ba ejensi penerit adat enggau profesional ngambika ulih ngiga orang ke nyadi ejen mai raban tu ke menua Kemboja.
“Cherita tu nyadi ke lalau ngagai semua sida ke ditan di menua Kemboja lalu ke pemadu berat kitai meseti madah ngagai apai indai tunga tuju kitai.
“Enti tusah jemah ukai orang bukai ti kiruh enti enda bala apai indai.
“Nama kebuah sida enda madahka tunga tuju? Saut tanya nya bisi ba sida. Tang aku pechaya semua 47 iku sida tu bisi kebuah diri empu,’ku Fatimah.