TBC PPWS Sarikei nerima penatai kaban ari 14 pampang bukai
Lebih 200 iku kaban Gerempung Raban Indu Sarawak (PPWS) ari 14 pampang udah ngerichahka agi pengerami ngintu Taun Baru China (TBC), malam kemari.
Pengerami tu diatur PPWS Sarikei lalu udah diatur ba sebuah restauran, semak ditu.
Kaban Parlimen ( MP) Sarikei, Andrew Wong Ling Biu ti dikangau datai ngulu pengerami nya madah, iya temegah ati meda penatai mensia mayuh sama begulu kelebih agi sida ti datai ari pupu bansa.
“Pekara balat ngemegahka kitai, tebal agi kaban PPWS bisi dipeda malam tu datai ari raban bansa bukai.
“Penyampau tubuh raban ari bansa Tionghua dalam PPWS nadai mayuh lalu sida ke bukai nya raban bansa bukai, kelebih agi sida ti megai pengarap Islam.
“Rampa baka tu ngayanka pengelantang enggau penyerakup bansa kitai ba Malaysia tu meruan teguh,” ku Andrew madah nyemetak.
Antara pampang PPWS ti bisi datai iya nya PPWS Sarikei, PPWS Kampung Jeri- jih, PPWS Belawai, PPWS Rajang, PPWS Pampang Muhibah, PPWS Kampung Baru Sungai Baji, PPWS Bukit Kinyau, PPWS Pampang New Cxoss Road, PPWS Pampang Fortuna, PPWS Nyelong, PPWS Mutiara, PPWS Town House, PPWS Merdeka enggau PPWS Sungai Baji.
Sama datai Penghulu Huang Tiong Kang ti ngarika Kaban Kunsil Nengeri ( ADUN) Repok Dato Sri Huang Tiong Sii, Chairman PPWS Sarikei Ummui Hani, Chairman Pengatur Lau Siew Ming enggau Sekretari Politik Kepala Menteri, Teng Ung Woo. KUCHING: Modul Perhimpunan 10 Minit (M10MP) dipejalai ngambika pengawa begempuru ba sekula ulih ngemansangka nembiak ari sukut nyadi ketuai enggau pengelandik komunikasyen.
Presiden Gerempung Pengajar Sarawak (KGS), Macky Joseph madah, maya bala nembiak diberi awak ngaul diri ba pengawa begempuru ba sekula, tu deka nempa budaya bekunsika pengawa belajar entara sida.
“Bisi sekula udah ngemeranka M10MP maya begempuru ninting minggu sida, bala nembiak deka niki ke panggau lalu mantaika projek sains, dero enggau ke bukai.
“Tu meri awak ngagai bala nembiak bekunsika penemu enggau bemacham pengelandik ngagai bala bakih bukai nengah kunsi belajar sereta ulih nempa pengandal sida bejaku ba mua mayuh enggau berunding chara kritikan sereta ngembuan disiplin ngatur jam diri,” ku iya.
Iya mansutka jaku tu nimbal langgur penemu Menteri Pelajar Dr Maszlee Malik apin lama ke udah ngambika sekula ngemeranka M10MP laban iya beratika modul tu bisi chara gawa ti kreatif, inovatif enggau enda konvensional nentuka bala nembiak rindu sereta ransing agi belajar.
Macky madahka pengawa begempuru ba sekula patut ditegapka agi setipak enggau peminta enggau pengandal Opis Menteri Pelajar Malaysia (KPM) deka nyapai tagit nembiak nyulut ba macham pengelandik.
‘ Kitai ngarapka konsep M10MP deka dikemeran ba mayuh sekula laban tu nangkup pekara inovasyen enggau kreativiti,” ku iya.
Minggu nyin tadi, Maszlee madahka M10MP dikena ngemanahka pengawa begempuru ninting minggu chara konvensional ba sekula ti ngemeratka budaya kreatif inovatif enggau regas ngaga bala nembiak.
Nitih ku Maszlee, pengawa begempuru ba sekula jeman baru patut ditegap setipak enggau pengerembai kemaya hari.
Berindik ari nya ku iya M10MP ti dikemansangka Palan Pematih Pengajar ( IPG) Kampus Ilmu Khas kenyau ari Januari 2017 deka dipejalai ba semua sekula primari enggau sekondari serata menua chara berenggat.
“Modul tu ngenegapka agi komponen Belajar Jeman Ke-21 (PAK21) enggau Pengelandik Berunding Tikas Tinggi (KBAT).
“Jaku ti panjai, pekara disebut nadai temu ujung enggau aktiviti begempuru ari sepiak aja patut diubah tekala nya laban tu ngasuh bala nembiak leju,” ku iya.