Palan Servis PH-DAP Katibas nyendia kaunter nyaup rejista, ngadu BSH 2019
Palan Servis Pakatan Harapan - Parti Tindakan Demokratik (DAP) N.62 Katibas udah muka kaunter dikena nyaup mensia mayuh ngerejister sereta ngaduka Bantuan Sara Hidup (BSH) 2019.
Kaunter ti dibuka sida ba Pasar Song belabuh ari ensana berupai beguna bendar ngelempungka pengawa rayat dia nyengkaum iya ke datai ari ulu sungai ngaduka BSH 2019.
Koordinator palan nya, Paren Nyawi madah, sida nyediaka servis nyaup rayat Katibas, Song ngaduka BSH 2019 sebedau peminta bantu nya ditutup 15 Mac ila.
“Taja pan baka nya, kaunter tu ditutup kena 14 Mac laban pom meseti dianjung ngagai Opis Pengumpul Cukai Dalam Nengeri (LHDN) Sibu kena 15 Mac ketegal menua tu empai bisi opis nya,” pia ku iya madah ngagai pengarang berita, kemari.
Berindik ari nya Paren ngarapka mensia mayuh ulih datai ngelawa opis sida ba Tingkat 1, No 33, Lot 249, New Song Bazzar di Song.
“Kaunter tu dibuka kitai ari pukul 8 pagi nyentuk 4 lemai,” ku iya madah baru.
Ba pekara bekaul, kelim- pah di Song, DAP Sibu mega nyediaka servis ke sebaka.
Mensia mayuh tau ngelawa Bukit Assek Help Centre di No 18, Tingkat 1, Lorong Chiew Siik Hiong 1A (084239 880,016-8720733/016702 1132), Messrs Wong Ho Leng & Co Advocates di No 17 (2nd floor), Lorong Tuanku Osman ( 084- 332 624/ 016- 702 1132), Indu Opis DAP Sibu di No 67, Rejang Park Commercial Centre (084-322001), Palan Servis Pengari Rayat P211 Lanang di No 2, Tingkat 1, Lorong Aman (084-336 671/016-665 6876), David Wong’s Service Center di No 6C, Tingkat 1, Lorong Seduan (019-868 5885/016800 5838).
Di Kapit mega mensia mayuh tau ngelawa Palan Servis DAP Kapit di 25, Jalai Teo Chow Beng (013-268 6799).