Perintah besai ngamatka semaya meri 100 juta dikena ngemanah sekula repuk di Sarawak
Sarawak udah nerima agih belanja RM100 juta ari perintah besai baka ti disemaya dikena ngemanahka 33 buah sekula repuk di Sarawak, pia ku Menteri Pelajar Dr Maszlee Malik.
Ku iya, agih belanja nya diberi ngagai Opis Kereja Raya (JKR) lalu projek digaga ngena sistem binaan industri (IBS) deka dipunka ba awak ke semak tu.
Maszlee madah munyi nya ngagai pengarang berita pengudah nemuai meri basa ngagai Kepala Menteri Sarawak ba opis iya di Wisma Bapa Malaysia ditu, kemari.
“Lebuh aku betemu enggau kepala menteri Sarawak sehari tu enggau Menteri Pelajar Sarawak (Datuk Seri Michael Manyin Jawong) nya meri sekeda asil.
“Kami berandauka isu bekaul sekula repuk di Sarawak lalu baka ni kitai begulai mutarka nya,” ku Dr Maszlee.
Bekaul berita ngetuka bekal minyak diesel ngagai 21 buah sekula di menua pesisir Sarawak, Maszlee madahka pekara nya n adai kala nyadi.
Iya ngenukuka bekal minyak diesel majak dianjung ngagai sekula ke bekaul.
Berebak enggau nya, ku iya kepala menteri udah setuju deka meransang mayuh agi nembiak ent arabansa ngambika nampung pelajar di Sarawak.
Ku iya mega, beberapa pekara bekaul imigresyen deka dikemudahka nengah kerejasama Perintah Nengeri Sarawak.
Lebuh ditanya sentang langgur penemu ti nentuka apai nyengulaka anak sida abis nadai naka form lima, ku iya, nya begunaka penemu ari semua enggau pansik sebedau dipejalaika.
“Ukai ukum ti dikemeratka kitai tang kitai beratka semua anak Malaysia bulih pelajar ke bekualiti,” ku iya.
Berebak enggau nya, Manyin meri terima kasih ngagai Maszlee ba pekara ungkup belanja RM100 juta ungkup sekula repuk sereta majak mekal minyak diesel ngagai 21 buah sekula di menua pesisir Sarawak. — Bernama