Perintah nengeri seruran beratka penyerakup rama dalam komuniti
Kelimpah ngemansangka ekonomi nengeri enggau infrastruktur, perintah nengeri mega seruran beratka penyerakup rama dalam komuniti dikena nyapai pemansang ke meruan.
Menteri Muda Perengka Pengangkut Datuk Dr Jerip Susil madah, perintah nengeri pechaya ulih ngempung penyerakup rama enggau nempa pengelantang laban nya kunchi pemujur nyadi nengeri maju.
“Pengelantang rama entara pekara ke pemadu beguna dikena nyapai pemansang ke sebela di Sarawak ke ditaga deka nyadi nengeri maju manggai taun 2030.
“Nya alai, semua renggat komuniti patut seruran bejalaika tanggungpengawa diri nyadi mata enggau pending perintah ngenataika penerang pasal aktiviti enggau sekeda isu ke ngelanggar atur ba kandang besemak enggau sida.
“Penerang, buah penemu enggau timbal ari ari komuniti beguna amat dikena nambahka pemanah servis ejensi perintah awak ke majak nyadi opis ke beguna dalam nyaup mensia mayuh,” ku iya.
Iya ke mega Kaban Kunsil Nengeri (ADUN) Mambong madah munyi nya rambau nutup Randau Pemansang Rama Sarawak ba Balai Mensia Mayuh Kampung Anah Sibakar di Padawan, kena Hari Minggu tu tadi.
Program tu diatur Opis Menteri Pengintu Pendiau, Pengelantang Komuniti, Orang Indu, Ruang Bilik enggau Pemansang Anak Mit begulai enggau Opis Residen Kuching sereta Opis Pelilih Mit Padawan.
Dr Jerip madah pemansang rama endang tanggungpengawa semua baikka nya perintah nengeri, perintah besai tauka gerempung ukai perintah (NGO).
“Peranak menua pesisir meseti bekerejasama enggau perintah nentuka pengelantang ruang bilik enggau semua pupu bansa,” ku iya.
Ba program nya, Dr Jerit bisi ngemendarka agih belanja RM800,000 dikena ngemujurka Projek Transformayen Menua Pesisir ( RTP) lalu RM200,000 ari nya dikena ngaga jalai alun ngagai ai wong Sibakar.
Udah nya, RM100,000 dikena ngemanah agi Padang Main Bol Kampung Anah Sibakar sereta 500,000 dikena melakin jalai kebun pemanjai 4 kilometres ari Kampung Anah Simutu/Sibakar ke Kampung Tepoi, Serian.