Kelas ajat indu ASADIA majak dikerinduka, ku Mabong
Sepenyampau 24 iku udah ngerejista diri belajarka ajat indu ti diatur Akademi Dayak Iban Sarawak (ASADIA) di Kuching.
Asadia ti betuaika Mabong Unggang madahka kelas ajat indu Iban enggau ‘kuntau’ majak nerima timbal ke manah ari mensia mayuh di Kuching.
Kelebih agi kelas ajat indu ke alai ari 24 iku, 17 ngambi kelas ajat nya,ku iya.
“Kelas kuntau diajar Andi Debis sereta dibantu menyadi iya, Kilau Debis.
“Seduai menyadi ex-anak murid ‘kuntau’ guro Patrick Tuat,”ku iya.
Ku Mabong,Asadia mega bisi ngatur kelas sape enggau belikan, betabuh, gendang pampat, ngaga marik empang sereta nusuk marik ngaga tumpa enggau rangki.
Ku iya,Asadia bisi merambu deka ngatur pengerami beserimbai enggau penembu kelas seni Iban enggau kelas main asal kena 4 Mei taun tu seraya ngelancharka kelas belikan.
“Aku ngarapka bala mayuh ngulu pengerami nya. Mika dijual RM400 sigi.
“Bala nembiak kami deka mantaika pengelandik nebah kereban musik belikan maya nya, lalu pengerami nya mega dipelabaka deka digulu Menteri Muda Nembiak Lumba enggau main,Datuk Snowdan Lawan ke alau nyadi temuai ti dipebasaka,” ku iya.
Penerang silik sentang kelas ke diatur Asadia tau ditanya ngagai Mabong ba lumur 0126925562.