Saup, bantu sida ti tasah angus ba Kampung Serasot, Bau

Mensia mayuh dipinta bela besaup mantu raban ti tasah angus ba Kampung Serasot, Bau nengah pupu belanja.

Chairman Parti Keadilan Rakyat (PKR), Mas Gading, Boniface Willy Tumek madah, ketegal penusah nya, dua isi bilik lenyau endur diau lalu beguna amatka pemeri mensia mayuh.

Iya madahka sida nya begunaka kereban dikena berapi baka dapur gis, tung gis, kali enggau chapak.

“Kami ngapil ngagai mensia mayuh datai nyuaka pemeri mata duit tauka barang ti diguna.

“Sida ti deka mantu ngena mata duit tau dipasuk nengah akaun CIMB Bank diempu Amil, ( 1011 0000 410153) enggau Rimet, RHB Bank 1112 7600 1495 25.

“Kami mega ngapil ngagai Kaban Kunsil Nengeri ( ADUN) Tasik Biru enggau Kaban Parlimen ( MP) Mas Gading jampat agi ngulihka bantu perintah ngambika ngentak baru rumah sida,” ku iya.

Kena Hari Empat tu tadi, penusah nyadi urung pukul 1.45 dini hari, ke alai rumah Amil Nohiam enggau Rimet Nyumeb udah angus lengis.

Sida serumah mujur ngelarika diri ti semina tinggal gari ba tubuh aja.

Kandang diatu, Amil enggau sida sebilik diau nyerak rumah kaban belayan ba Kampung Serasot seraya Rimet enggau sebilik ngenduh ba dampa barang kebun ti enda didinding apus, besemak enggau taba rumah ti angus nya.

Amil gawa nyadi pulis budu ba Sekula Primari (SK) Serasot, bisi tiga anak enggau bini. Siku ari anak iya diatu benung nampung pelajar ba Universiti Teknolog Mara ( UiTM) Samarahan.

Anak indu iya nya irau amat laban nyauka semua gari angus dalam penusah nya lalu enda nemu baka ni chara deka mulaika dir ngagai kampus ba minggu baru.

Rimet mega gawa nyad polis budu ba sebuah makit besai lalu bisi empat iku anak enggau bini. Iya semina mujur ngelarika motosika ari angus diempa api.