Anjung dachin ngagai MCM ngambika diperesa
SIBU: Sepenyampau 55 iti kes nipu bekaul Akta Timbang enggau Sukat 1972 dirikodka taun siti tadi alai perengka dikena nimbang enda dianjung ngagai Metrology Corporation (MCM) Sdn Bhd ngambika diperesa sekali dalam setaun.
Ketuai Opis Menteri Pengawa Dagang Dalam Nengeri enggau Pekara Orang Bebeli Barang (KPDNHEP) Sibu Roslee Maslie madah, opis sida mega bisi ngetan barang beungkus RM9, 685 sereta ngeluarka saman sepenyampau RM9,450.
“Semua perengka nimbang meseti dianjung ngagai MCM Sdn Bhd ngambika diperesa.
“Nyema ngelanggar atur tu tau ditinggang ukum enda ngelui ari RM4,000 tauka dijil ba pengelama enda lebih tiga taun tauka dua iti ukum tu,” pua ku iya madah.
Iya madah, MCM Sd Bhd deka ngelekatka penerang ba perengka nimbang sepengudah perengka nya ditentuka manah.
Ketegal nya, Roslee minta mensia mayuh nimbang baru barang ke dibeli sida nyema ngasaika pemerat nya enda nitihka rega.
“Kitai bisi nyediaka dachin ba Makit Sentral Sibu ngambika dikena mensia mayuh nentuka pemerat barang ke dibeli sida,” ku iya madah baru.
Iya madah, nyema pemerat nya enda sama enggau pemerat ari alai orang bejual, mensia mayuh tau betelefon ngaga KPDNHEP Sibu nengah lumur 084-329202.