PVAS mantu ex-kaban tasah angus ba Kampung Serasot, Bau

Serakup Veteran Armor Sarawak (PVAS) udah nyuaka pemeri ngagai Rimet Nyumbieb, 55 taun, sebilik, ex-kaban Veteran Armor Sarawak.

Kenu ku Chairman PVAS Goyee Gajen, raban sida udah nyuaka pemeri barang dapur enggau mata duit dikena ngelempungka tating penusah sida Rimet sebilik pengudah rumah dituntung penusah angus ba Kampung Serasot, Bau kena 15 Februari tu tadi.

“Nasit nadai penusah bebadi nyawa taja dua iku ari kami sebilik bisi bakal. Semua dokumen beguna an- gus magang, kerita enggau mutosikal mega enda ulih idup laban semua kunchi lenyau magang ba penusah nya,” ku Rimet mantaika penyinu diri ensanus.

Ku iya, penusah nya nyadi ngenyit amat, urung pukul 1.30 dini hari lebuh semua benung jenak tindu.

Goyee enggau exco PVAS deka ngatur pupu ngenyit ngagai bala kaban dikena mantu sida Rimet sebilik.

Raban sida mega dipadah Rimet ulih minta Skim Penusah Ngenyit ari Opis Pekara Veteran ATM.

Sida Rimet sebilik diatu diau bedampa, semak rumah ti angus lalu nadai bekal kuasa karan.

Lebuh ditanya dini endur sida diau, Rimet nunjukka dampa nya ngagai raban PVAS ti mega bejalai ngabas Sulaiman Taib ti ditepan penyakit tungkul sengayuh.

Raban sida mega bisi ngabas Roslan Amit ti ditepan penyakit kemi manis enggau bepenanggul buah punggung lalu diatu ngena kerusi roda. Seduai ti sakit tu mega nerima pemeri ari raban PVAS.

Sama bisi nyempulang pejalai nya Ketuai Pemadah PVAS, Jossem Daweng.