Pemidang niang Cobbold deka meri empas besai ngagai parti enggau bansa Dayak: Julius
Raban Parti Bansa Dayak Sarawak Baru (PBDS Baru) udah datai meri basa ke penudi ngagai Presiden sida, niang Cobbold John.
Penatai sida maya nya betuaika chairman PBDS Baru sitak tengah, Julius Enchana ti bela nganjung tulung ari pupu bala raban ngagai bini niang, Puyang Laing.
Julius madahka pemidang niang Cobbold meri empas ti besai ngagai parti kelimpah bansa Dayak empu.
“Iya orang ti liat ati ng- etanka hak Dayak ba tanah sida sereta endang ransing meri penerang bekaul enggau Kod Tanah Sarawak enggau nama empas Seksyen 6 ba sida ke ngempu tanah di serata Sarawak.
“Niang mega orang ti nelap, enda ringat ngagai orang ti enda sepenemu enggau iya,” pia ku iya madah, ensana.
Ba parti ku Julius, niang chakah bendar ngangkatka PBDS sekumbang ke udah dipadu megai pengawa nyadi presiden kenyau ari taun 2016.
“Sepengudah direjista ba taun 2013, PBDSB dipeda semun tang udah niang megai, niang ngidupka baru semengat Dayakism ke ditengkebang niang Dato Sri Daniel Tajem.
“Niang enda leju ngereja pengawa lebih agi bejakuka bansa Dayak tajapan sua dikeremba orang bukai. Iya orang ti ngembuan integriti ke tinggi sereta enda mudah alah dibeli ngena duit,” ku iya serayamadahka Cobblold chakah ngempung nem- biak Dayak Baru beserakup dalam siti parti politik, iya nya PBDS.
Sekumbang ke nyadi presiden, niang Cobbold udah mujur ngerembaika PBDS nyentuk ke Kapit, Sibu, Kuching, Sri Aman, Serian, Miri, Lundu, Selangau, Saratok, Telang Usan sereta menua ke bukai.
Nyempulang Julius iya nya Mandal Presiden Andrew Puro, Tukang Wang Bobby William, Ketuai Raban Nembiak Rapelson Richard Hamit sereta bala bukai.