Tengah bebulaka jaku tuduh madah iya deka ninggalka PBB

Sapit Presiden Parti Pesaka Bumiputera Bersatu (PBB), Datuk Amar Awang Tengah Ali Hasan bebulaka jaku tuduh ti madahka iya deka ninggalka parti nya ngambika ulih ngiring Parti Sarawak Bersatu (PSB).

Jaku tuduh dikerembai dalam ‘ Whatsapp group’ nya ti disempulang enggau rintai bala ketuai PSB ke alai Awang Tengah empu nyadi presiden.

Ex- Parlimen Selangau, Datuk Joseph Entulu disebut nyadi penyandang penuduk kedua tetinggi dalam parti nya ke nyadi sapit presiden begulai enggau Dato Sri Wong Soon Koh sereta Dr Abdul Rahman Ismail.

Taja pia, opis Awang Tengah nengah sebengkah penerang kemari ngenadaika jaku tuduh nya sereta m adahka nya pengawa orang ke manchal ke negmbuan niat enda manah deka mambarka Gabungan Parti Sarawak (GPS).

“Datuk Amar Awang Tengah enggai nimbal berita selebubu ke enda temu pengamat nya ti dikerembai ‘Whatsapp group’nya.

“Tuduh nya digaga orang ke manchal sereta ngembuan niat enda manah ti deka nyarutka GPS,” ku penerang nya.

Sama bisi dalam rintai ketuai PSB ke deka digaga ila iya nya Datuk Dr Jerip Susil (Setiausaha Agung), George Lo (Sapit Sekretari Besai), Dr Johnical Rayong (Ketuai Nembiak) enggau Rosey Yunus (Ketuai Indu).

Pengku pengawa bukai nyengkaum Tukang Wang Besai (Datuk Masir Kujat), Sapit Tukang Wang Besai (Ripin Lamat), Mandal Presiden Kanan (Datuk William Nyalau, Datuk Tiong Thai King enggau Datuk Naroden Majais), Ketuai Pemadah, Datuk Sylvester Entri Muran dibantu Dato Ranum Mina enggau Richard Will.

Lima pangku pengawa mandal presiden PSB deka diisi Datu Len Talif Salleh, Razi Sitam, Datuk Mong Dagang, Banyi Beriak, Dominique Ng enggau Bruce Lee.