Juluk ati nyadi ke peransang Florance nyulut ba STPM
Deka nyadi orang keterubah ari sida sebilik nampung pelajar ngagai universiti sereta deka meda apai, sida sebilik temegah ke pemujur nya
SIBU: Juluk ati deka nyadi orang keterubah ari sida sebilik sekula nyentuk ke Universiti, nyadi pengeransing ngagai Florance Augustine Usit belajar bebendar nyentuk ke bulih 4A ba peresa Sijil Tinggi Pelajaran Malaysia (STPM).
Nembiak Sekolah Menengah Kebangsaan ( SMK) Methodist tu madah, enggau pemutus nya, iya andal amat ulih nampung pelajar baikka ba Universiti Putra Malaysia (UPM) tauka Unimas.
“Aku enda ngadang bulih semua A tang aku bebendar ngulihka A.
“Pengeransing tu bepun ari aku deka meda apai enggau kami sebilik temegah ke pemujur tu,” pia ku iya ma- dah ngagai pengarang berita maya ngambi slip pemutus STPM iya di sekula nya, kemari.
Florance, anak pengkuan ari tiga iku diri menyadi. Menyadi indu ke tuai gawa nyadi misi di Sepital Kanowit enggau siku agi menyadi lelaki iya diatu benung gawa di Johor.
“
Aku enda ngadang bulih semua A tang
” aku bebendar ngulihka A.
Florance Augustine Usit
Nembiak SMK Methodist
Apai iya gawa nyadi deriba lori, lalu indai iya udah midang dua taun ke udah.
Florance maya ke ngabas pemutus peresa kemari, dianjung aya iya ti enggau diau begulai di Jade Villa ditu.
Maya berandau nya mega, iya madahka apai iya empai nemu berapa A ulih iya ba peresa nya.
Bekunsika chara belajar, Florance madah, iya enda ngambi pelajar luar tauka tuisyen tang belajar di rumah tauka belajar begulai enggau bala bakih.
“Ba pengawa nyendiaka diri napi peresa, aku endang belajar naka alah taja enda tuisyen,” ku iya ti nyadi ketuai nembiak (‘Pengawas’) enggau raban Kelab Main Asal sekula.
Kelimpah ari nya, SMK Methodist nyengkaum Florance taun tu bisi tiga iku nembiak bulih A magang.
Sida ke bukai tu iya nya, Doris Tiong Shu Qi enggau Michelle Kho Siew Zheng.
Lily Loh Tze Eng, Wong King Feng enggau Stella Lee Sing Wei bela bulih 3A, 1A-.
Nembiak ke bukai iya nya Julaika Nazwa Junaidi (3A 1B+) enggau Jeremy Tou Jia Hao (3A, 1B).