Pekedai runchit putus jari kiba pengudah dipantap ngena duku
Siku pekedai runchit putus jari kiba pengudah dipantap ngena sebilah duku ke nyadi ba Pasar Kabong, malam ensanus (Hari Minggu).
Ketuai Polis Pelilih (KPD) Saratok, Deputi Superintenden Polis (DSP) Mordani Tanin madah, penusah nya dipelaba nyadi urung pukul 10.30 malam di sebuah kedai runchit ti nadai lumur di Pasar Kabong.
“Pekedai runchit nya ke beumur 25 taun lebuh penusah nya nyadi benung dalam kedai iya ke alai ngenyit datai siku lelaki ke beumur 24 taun mai sebilah dulu lalu terus nyerang iya.
“Iya ke tekenyit meda penatai suspek ke terus nyerang iya udah ngujungka iya enda sempat lari tang nyilat ngena jari ti ngujungka jari kiba iya putus.
“Suspek udah mantap iya tiga kali ti ngujungka jari kiba iya ari ujung tunjuk nyentuk buku lengan iya putus,” ku iya ba sebengkah penerang ngagai media, kemari.
Lebuh ke nyerang nya, suspek udah mantap pekedai run- chit tiga kali ti ngujungka jar kiba ari ujung tunjuk nyentuk ke buku jari iya putus.
Udah nya iya lalu dibai ngagai Klinik Pengerai Kabong lalu nangkanka nya dibai ke Sepital Sarikei ngambika diperubat lalu nyentuk ke diatu iya diberitaka manah.
Berebak enggau nya, ku Mordani, suspek udah mujur ditangkap.
“Kebuah ke bendar penyad nya agi dipansik polis lalu kes nya udah dipansik ari baruh Seksyen 326 Kanun Keseksaan,” ku iya.