Tim Kabaddi Indu Sarawak pechaya deka bulih midul emas ba SUKMA 2020
Tim Kabaddi Indu Sarawak andal sida deka bulih midul emas ba SUKMA 2020 ti diatur di Johor, taun ke deka datai.
Ketuai Jurulatih Kabaddi Sarawak, Ganisan Punisamy madah, pengandal iya tu bepun ari tim indu main nya diatu ba rintai keterubah pemadu manah dalam menua Malaysia.
“Ba Pekit Kabaddi Tebuka Sarawak 2018 enggau di Kejohanan Kabaddi Kebangsaan Kuala Lumpur, tim indu Kabaddi Sarawak mujur bulih gelar champion.
“Nya alai, enti main tu dipasukka ba SUKMA 2020, kitai pechaya tim indu nadai bepenanggul bulih midul emas,” pia ku iya madah ngagai pengarang berita, lemai ensana. Dulu agi ari nya, iya ngulu Woksyop Main Kabaddi 2019 ungkup sitak Sibu ke diatur Perbadanan Sukan Sarawak (SSC) begulai enggau Kaunsil Lumba eng- gau Main Nengeri ( MSN) sereta Gerempung Kabaddi Sarawak ba Stadium Tertutup Sibu.
Ganisan madah, taja pia tim lelaki Kabaddi nengeri tu engka bepenanggul ngulihka gelar champion ketegal betapi enggau tim ti kering baka Wilayah Persekutuan, Selangor, Perak enggau Kedah.
“Tim lelaki kitai kediatu ulih nyangkaika kediri ba penuduk lumur tiga lalu ke pemadu manah lumur dua.
“Sida nadai penanggul besemekih nyentuk renggat semifinal tang empai mujur bulih gelar champion,” ku iya madah.
Woksyop ke diatur berengkah 9 Mac nya digulu 23 iku nembiak enggau lima iku pengajar ari lapan buah sekula di Sibu.
Tuju woksyop tu iya nya mantaika nama bagi main kabaddi, nambahka penemu enggau chara main chara ngatur main kelimpah nyaup bala jurulatih nyid pengelandik ke bisi ba bala nembiak sekula.
Ari tu mega, penemu enggau pengelandik bala pesereta deka disungkak ke agi seraya ngeringka pemerani, komitmen enggau ulah begempung tauka kerejasama.
Woksyop nya bela dikeandal deka nyadika pengemun nambahka palan main kabaddi di pelilih Sibu.
Sama bela datai enggau pengawa nutup woksop tu iya nya Pemesai Raban Nembiak, Lumba enggau Main SSC Mikar Changgan enggau Ketuai Zon Tengah SSC Gloria James.