Ngepan asal Iban, ‘Baju Ujan’ deka diangkat baru
KUCHING: Ngepan asal ke dikelala enggau nama ‘Baju Ujan’ patut diangkatka baru. Beberapa taun sebedau tu ngepan lama kitai Iban baju ujan tu nyau enda dikeingatka agi.
Ngepan asal Baju Ujan tu, ngepan lama ke tebilang agi dikena orang di Batang Rajang. Ngepan tu sigi digaga penuh enggau marik. Marik dikena ngaga baju ujan tu mega dikena sigi ngena marik lama baka marik buah Pelaga.
Keloni Anak Hambeh, ketuai gerempung Oniey Ibaniez Costume (Pengelandik Kumang Lulong), ngembuan pengelandik jari ba pengawa nusuk baju ujan tu.
Pengangkun ati iya ngangkatka ngepan lama baju ujan tu ketegal sayau ke ngepan Iban tu ila lenyau pia aja ditinggal arus pemansang dunya.
“Pengangkun ati aku sayau ke ngepan lama tu nyuruh aku bisi juluk ati deka belajar nusuk baju ujan tu. Enggau ati ke liat aku belajar ngambika ngepan tu majak dikerinduka rebak ti deka datai.
“Ukai semina deka ngangkatka ngepan lama tang aku mega endang rindu ke semua pengelandik jari kelebih agi nusuk marik ngaga nyadika baju ujan. Pengerindu nusuk marik tu laban mayuh bala ke rebak diatu enda ngelala ngepan ti dikumbai baju ujan ketegal lama udah enda ayan.” ku iya.
Pengerindu sereta pengeransing ati iya ngaga baju ujan tu bela dikerindu bala bukai ke sama ngembuan pengerindu ngena ngepan tu. Peminta ari bala mayuh ke minat ngaga baju ujan, dia iya ngatur woksyop ngaga baju ujan.
“Nitihka peminta ari bala mayuh dia aku lalu berunding ngaga woksyop nusuk baju ujan tu. Sambut bala ke rindu pan manah amai, ukai semina bala sida ke indu aja, bisi mega sida ke lelaki rindu ngaga baju ujan ti bisi ngulu woksyop ke diatur aku”.
Aku berasai gaga ati laban mayuh bala bukai ke ngem- buan ngaga baju ujan. Enggau chara tu, dia ngepan asal kitai tu enda pu nas ditinggal segang pemansang dunya moden sereta ba maya ti deka datai. Chura tauka ‘motif’ mega aku ambi nitihka chuan ari baju ujan ke lama. Pia mega aku bisi ngaga chura moden ngambika sebaka enggau gaya ba fesyen dunya ke diatu.
Aku ngarapka bala ti rindu ke ngepan asal kitai sama bela enggau aku besaup ngenanka ngepan asal kitai tu, ukai semina baju ujan aja sama mega ngepan asal kitai Iban.
Ari nya, ngepan asal kita deka dikelala sereta dikelakuka ngagai rebak baru Pengangkun kitai ke ngepan asal ba maya diatu ketega kitai deka ke ngepan kita dikelala orang diserata dunya pia ku Keloni nambah maya dikerandau pengarang berita bedau lama ti udah.