Program ‘Jom ke Sekolah’ ngangkatka penyulut sereta nempa pemanah ulah
Program ‘Jom ke Sekolah’ sebagi ari pengawa Opis Menteri Pelajar Malaysia (KPM) nengah kerejasama enggau Polis Diraja Malaysia ( PDRM) dikena ngangkatka penyulut sereta nempa perangai nembiak ngambika ngembuan ulah ti menyana.
Prinsipal Sekula Sekondari (SMK) Sungai Paoh Sarikei, Paul Law Nai Kung madah, Program Jom Ke Sekolah siti Strategi Lautan Biru Kebangsaan (NBOS) KPM begulai enggau PDRM nengah Opis Nyeliah Pengawa Jai enggau Pengelikun Komuniti (JPJKK).
Ku iya,KPM amat ngarapka nengah Program nya ulih nempa kerejasama ke tegap agi enggau raban sekula sereta Pemesai Pengerembai Kaul Sekula (PPS).
“Program tu mega dikearapka ulih nyeliahka bala nembiak enda nurun besekula, mantu nyeliah nembiak ari ngereja penyalah disiplin enggau ngereja pengawa jai sereta enda beradat sekalika di dalam tauka di luar sekula.
“Program Jom ke Sekolah nya sebagi ari pengawa Opis Menteri Pelajar Malaysia (KPM) nengah kerejasama enggau Polis Diraja Malaysia (PDRM) dikena ngangkatka penyulut sereta nempa perangai nembiak ngambika ngembuan ulah ti menyana.
“Nengah program nya dikearapka sekula kelebih agi bala pengajar ulih bejalaika pengawa ngajar, ngembing sereta ngemudah chara kelimpah nyadi pengajar disiplin,” ku iya.
Paul bejaku munyi nya ba Pengereami Ngelancharka Program ‘Jom Ke Sekolah’ di SMK Sungai Paoh, kemari.
Bisi 646 iku nembiak enggau apai indai sida ngulu program nya.
Ku Paul,raban sekula mega meseti nguji nempa enviromen ti kondusif sereta ngangkat- manah perengkaguna di sekula ngambika bala nembiak ulih ngasaika proses ngajar enggau belajar ti ngelantang sereta ngerinduka ati sida.
“Opis Menteri Pelaajar udah ngemujurka bemacham inisiatif nyengkaum ngemasukka elemen belajar ti ngerinduka ati dikena nentuka bala nembiak gaga ati nurun besekula sereta ulih nempa mensia ke seimbang sereta lantang nyengkaum pekara intelek, rohani, emosyen enggau jasmani.
“KPM nguji numbuhka ekosistem belajar abad ke21 dikena nentuka juluk Philisophi Pelajar Menua ulih dijapai nengah budaya sekula, perengkaguna, kaul apai indai komuniti, pengajar ke profesional sertea proses ngajar enggau belajar ke ngasi,” ku iya.
Paul mega ngelalau apai indai meransang sereta matau pejalai bala anak sida ngambika nurun besekula sereta fokus ngagai pelajar sida.
“Kena memanah mih semua peluang ke bisi dikena ngulihka pemandai sereta ngansah pengelandik ngambika ulih nyadi mensia ke mujur.
“Gaga mih sekula nya endur ngulihka pemandai, nempa peneleba, nempa pengelandik sereta ngansah pengulih nyadi ketuai laban kita mih reta menua ke berega ungkup jemah ila.
“Jauhka ari pekara ti nadai meri pemaik sereta anang tepejuh runding enggau pengawa ti enda manah sereta enda beradat baka enda nurun besekula, ngemedis nembiak bukai, dadah enggau ke bukai ti tau ngerusak diri enggau pengidup kita ke nembiak jemah ila,” ku iya.
Sama bisi ngulu pengerami nya, Pemesai Pengerembai Kaul Sekula (PPS) Inspektor Mohd Fauzi Maludin enggau Ketuai Gerempung Apai Indai enggau Pengajar (PIBG) SMK Sg Paoh, Rigan Lewi.