Yeu minta saup mensia mayuh ngiga bini, dua iku anak indu iya SARIKEI:

Siku lelaki diatu benung begigaka bini enggau dua iku anak indu iya ti udah enda temu kenyau ari 26 Januari (Hari Enam) tu tadi.

Yeu Siew Kiin, 46, madahaka lebuh iya pulai ke rumah sepengudah tembu kereja urung pukul 7 lemai maya hari nya, bini enggau dua iku anak iya endang udah nadai ba rumah.

“Lebuh datai di rumah deka makai malam begulai enggau diri sebilik, aku meda bini aku ti benama Emy Tungau, 28 taun enggau anak indu tuai ti beumur 10 taun lalu ke biak beumur 4 taun, nadai dipeda bisi ba rumah kami ti bepalan ba Marudu Sarikei.

“Aku enda nemu nama ketegal bini aku mai kededua anak kami lari ti nadai ninggalka berita nyentukka saritu.

Beserimbai enggau nya, aku minta saup ngagai sapa sapa ti ngelala bini enggau anak aku nya, ngambika madah ngagai sida awakka pulai ke rumah,” ku iya lebuh ti betemu enggau media kemari.

Irau ke pengelikun bini enggau anak iya, Yeu pengudah nya lalu ngaga ripot polis.

Berindik enggau nya, Yeu minta sapa ti bisi ngembuan penerang bekaul enggau bini sereta anak indu iya ngambika madah tauka betelefon ngagai iya ba lumur 013-265 6929.