Lapan chalun ari Sarawak chukup nyulut ba peresa SPM 2018
Sarawak bisi lapan (8) iku chalun Sijil Pelajaran Malaysia (SPM) 2018 ti teulihka pemutus peresa ti chukup nyulut bulih Gred A+ dalam semua subjek ke diambi.
Pemutus nya dipadahka Sapit Direktor Opis Pelajar Sarawak, Abang Mat Ali Abang Masagus lebuh mantaika pemutus peresa SPM 2018 Renggat Nengeri Sarawak, kemari.
Iya madah, bepelasarka pemutus peresa SPM 2018 semua sekula di nengeri tu chukup manah.
“Ari penyampau lapan (8) iku chalun teulihka pemutus peresa ke chukup nyulut, bisi dua (2) iku teulihka 10A+, enggau bisi 6 iku bulih 9A+ dalam semua pelajar.
“Chalun ke teulihka pemutus peresa ke chukup nyulut, 10A+ ba semua subjek ke diambi iya nya Alvin Soo Qwan Zhou ari Sekolah Menengah Kebangsaan Bintulu, Bintulu enggau Nur Izzah Athirah Abdul Samat ari Sekolah Menengah Kebangsaan St Teresa, Kuching.
“Lalu enam iku teulihka pemutus 9A+ ba SPM 2018 iya nya Constance Wong Chia Yii ari Sekolah Menengah Kebangsaan Sg Maong, Padawan; Muhamad Hazim Isa enggau Nazmi Ahmad Nizar ari Sekolah Menengah Sains Kuching Utara, Padawan); Muhamad Maziz Azri Maznan (Sekolah Menengah Sains Miri, Miri); Allister Daniel Linggong enggau Kevin Yok ari Sekolah Menengah Kebangsaan Merbau, Miri,” ku iya.
Pengawa mantaika pemutus SPM 2018 Renggat Nengeri Sarawak diatur ba Auditorium Opis Pelajar Nengeri Sarawak ditu.
Dulu ari nya, Mat Ali madahka pemutus peresa SPM 2018, chalun Nengeri Sarawak bepelasarka penyampau Gred Purata Negeri ( GPN) bisi nurun dibandingka enggau taun 2017.
“Pemutus tauka penyulut chalun Nengeri Sarawak taun tu nitihka penyampau GPN, nurun ari 5.17 ba taun 2017 ngagai 5.19 taun 2018.
“Bepelasarka GPN, penyulut chalun SPM Nengeri Sarawak taun 2018 nurun sepenyampau 0.02,” ku iya.
Taja pia iya madahka penyulut chalun Nengeri Sarawak dalam SPM 2018 manah agi tauka sama enggau penyulut renggat nengeri dalam 47 subjek.
Ku iya, nitihka penyampau Gred Purata Sekolah (GPS) bisi 19 buah Sekula Sekondari Nengeri Sarawak ke chukup nyulut, iya nya teulihka GPS 4.00 enggau ke baruh.
Entara sekula sekondari Nengeri Sarawak ti teulihka GPS ti chukup nyulut tinggi iya nya Sekolah Menengah Sains Kuching Utara, Padawan enggau penyampau GPS 1.94, Sekolah Menengah Sains Miri (GPS 2.30), SMK Sacred Heart, Sibu (GPS 2.65), SMK St Elizabeth, Sibu (GPS 2.65),Kolej Datuk Patinggi Abang Haji Abdillah, Kuching (GPS 2.91),SMK Agama Tun Ahmad Zaidi, Kuching (GPS 2.91), SMK Methodist, Sibu (GPS 2.93) enggau Sekolah Menengah Sains Kuching, Padawan (GPS 2.97) sereta ke bukai.
Bekaul enggau pemutus peresa nya, chalun ke deka ngemetulka penerang diri dalam slip pemutus, meresa baru tauka ngemaruka pemutus, patut ngaduka nya dalam timpuh 30 hari berengkah kemari lalu pemadu laun 14 April 2019.
Berengkah ari taun 2015, bayar meresa baru pemutus ke tetiap subjek iya nya RM100 ngena ‘ wang pos’ tauka ‘kiriman wang’ atas nama Akauntan Negara Malaysia.
Pom nya tau diambi ba sekula, Unit Penilaian dan peperiksaan, Opia Pelajar Pelilih Menua di serata Sarawak tauka Sektor Penilaian dan Peperiksaan ba Indu Opis, Opis Pelajar Nengeri Sarawak, Jalai Diplomatik Off Jalai Bako, Kuching.