KUCHING: Kota Samarahan enggau Padawan dipilih endur bejalaika Operasyen Rabies Sarawak, pengudah projek pemungkal operasyen nya mujur diatur ba pelilih menua Lundu enggau Bau.
Sapit Kepala Menteri ti mega Chairman Komiti Mutarka Penusah Ngenyit Sarawak ( JPBNS), Datuk Amar Douglas Uggah Embas madahka operasyen nya ke diatur ba Kota Samarahan enggau Padawan dipejalaika dalam timpuh 12 hari.
Iya madahka operasyen nya nerima saup ari opis residen enggau opis pelilih menua ke alai sida dipinta nerangka nama batang tuju operasyen genturung pendiau tauka Kampung di kandang menua Kota Samarahan enggau Padawan, kelimpah ari ngitung pemayuh ukui ke bisi orang ngempu ke udah dituchuk ngena anti-rabies.
“Maya ngaga ‘post-mortem’ projek pemungkal Operasyen Rabies Sarawak, kami beperambu ngatur operasyen tu baru.
“Nya alai sehari tu (kemari) kami ngemutuska berengkah 4 ngagai 15 April 2019 Op- erasyen Rabies Sarawak deka dipejalaika ba Kota Samarahan enggau Padawan,” ku iya.
Uggah mansutka pekara nya dalam aum pengarang berita pengudah nyadi chairman Mesyuarat Penyelarasan Operasi Rabies Bil 5/2019, JPBNS ti diatur ba Bilik Gerakan Negeri , Tingkat 1, Wisma Bapa Malaysia ditu, kemari.
Lebuh ti ngenang pasal pemujur projek pemungkal Operasyen Rabies Sarawak ba pelilih menua Lundu (1 - 4 Mac 2019) enggau Bau (6 - 10 Mac 2019), Uggah madahka operasyen nya mujur tauka nyulut dipejalai.
Ba Lundu ku iya, pemayuh ukui sebedau operasyen dipelabaka 2,794 iku lalu asil ari operasyen pengelama empat hari nya bisi 2,559 iku ukai tauka 91 peratus mujur dituchuk vaksin lalu 673 iku ukai lelang dipunaska. Lalu di Bau bisi 81 peratus pemayuh ukui mujur dituchuk ngena vaksin anti-rabies.
Asil ari projek pemungkal operasyen nya, bisi 137 iku ukui udah dipasukka mikrocip, ku iya seraya madahka udah tu juluk komiti nya ba Bau enggau Lundu deka mindahka 1,756 iku ukui.
“Diatu kami bejalaika pengawa ngemasukka mikrocip ngagai tubuh ukui , ti udah dipenyadi ba Lundu apin lama, ke alai nya deka bisi rikud ukui udah dituchuk, bisi ID tetap ukui.
“Nyema eksperimen tu (mikrocip) mujur dipejalaika, tu deka dikemeranka kitai,” ku iya.
Kelimpah ari lebuh ditanya bekaul enggau kes kena ketup kera lelang ba Taman Hui Sing ke dikerembaika ba media rama apin lama, Uggah madahka orang ke kena ketup