Teknologi bidang perubat ti manah nentuka Derisa ulih nyapai penyulut dalam pengawa SIBU:

Pemisi teknologi ke manah agi dalam bidang perubat, bala Derisa (MA) ulih ngerejaka pengawa enggau manah sereta nyapai penyulut dalam pengawa.

Pemantu Khas Kaban Parlimen (MP) Sibu Chieng Lee Sing madahka elemen latih enggau nyadi ketuai ti manah enggau rampa kereja ti kondusif ulih ngangkatka agi tikas pengerai komuniti.

“Tu seriris enggau tema ngintu hari MA taun tu iya nya ‘A Caring Profession Towards Healthy Community’,” ku iya lebuh ti bejadika Pengerami Makai Lemai Malam Gala beserimbai enggau pengerami ngintu Hari Derisa 2019 ba sebuah hotel ditu malam kilah ensana.

Ku Chieng madah, nyadi Derisa, sida iya nya sebagi ari pemujur servis nyaga pengerai komuniti.

“Ari peneleba aku, profesion kita ngembuan sejarah ti pemadu panjai ungkup guna pengerai komuniti. Lalu seriris enggau ubah pemansang dunya, kita tetap tan lalu enda kala bisi ngembuan pengingin ngemaduka diri.

“Dini pan kita meri servis, sekalika ba tempat ti pemadu jauh ba menua kitai tauka di mengeri, aku deka madah, klien kita endang seruran meri basa ti besai be servis pengasih ti diberi kita ngagai sida.

“Kita tu nyadi ‘hero’ dalam bidang pengelandik kita empu. Taja pan nyangka kita napi mayuh penguji enggau penanggul dalam pengawa, komitmen ninting hari tauka dalam pengidup kita, aku pechaya, nengah pemerani sereta pengeransing kita, jalai nuju pemujur kelebih agi dalam pengawa sereta pemendar kita ngembuan pengidup ti manah dudi hari ila,” ku iya.

Sama bisi datai iya nya Derisa Bagi Menua Sibu Dr Teh Jo Hum, Direktor Sepital Sibu Dr Ngian Hie Ung, Ketuai Derisa Sepital Sibu Nicholas Samuel enggau chairman pengatur pengerami Florian Freddy Harlan.