SMK Methodist ngerikod chalun SPM paling mayuh bulih A dalam semua subjek ba Sarawak SIBU:

Sekula Sekondari (SMK) Methodist ditu udah ngerikod penyampau chalun Sijil Pelajaran Malaysia (SPM) 2018 paling mayuh ba Sarawak ti bulih A dalam semua subjek ke diambi ba peresa taun nyin kemari.

Penolong Kanan Hal Ehwal Pelajar Lee Siew hing madah, 40 iku ari 318 iku nembiak sekua nya ti peresa SPM 2018 nya teulihka A dalam semua subjek.

Ku iya, ari semua penyampau nya, dua iku nembiak udah teulihka 12A lalu 11A bisi enam iku, 10A (21), 9A (&) sereta empat iku nembiak bulih 8A.

“Taja pia, ba taun tu nadai siku chalun nya ke bulih A+ dalam semua subjek ke diambi enti dibandingka enggau lima iku nembiak ari 73 iku ke bulih semua A (A+, A, A-) ba SPM taun 2017.

“Ba taun tu mega semina lapan ari 19 subjek ke diambi nya bisi nambah Gred Puku Rata Sekula ( GPS) SPM 2018 ti dirikod iya nya 2.93 dibanding enggau 2.84 ke dirikod ba taun nyin kemari,” ku iya lebuh ke ditemu kemari.

Ku Lee madah, taja pia iya endang puas ati enggau pemutus ti dibulih nya ari bala nembiak dalam peresa SPM 2018.

Ku iya nambah, iya ngenataika pengaga ati ba sukung raban PIBG sereta Kaunsil Pengatur Sekula nyentukka mujur ngadaka kaul ti manah entara apai indai enggau pengajar di sekula nya.

Iya mega bela meri besai terima kasih ngagai Gerempung ukai Dikuasa Perintah (NGO) enggau bala bukai ke udah meri komitmen ti tinggi ngagai sekula ngelama tu.