BN10 PGA mujur mutar bemacham kes sepemanjai taun 2018
Batalion 10 Pasukan Gerakan Am ( PGA) Sibu mujur mutarka kes ke beungkus lebih RM4 juta sepemanjai taun 2018.
Pegawai Pemerintah BN10 PGA Sibu Supt Sanudin Md. Isa madah, kes ti pemadu besai iya nya kes ngerampas kayu nadai lisin ke beungkus RM2,350,000.
“Nangkan ke nya operasyen bekaul nyengkaum kes enchuri pasir ke beungkus RM1,500,000, ngerampas barang ke dibai ngagai menua tu enggau chara belalai ti beungkus RM381, 340, kelimpah dua iti kes bekaul enggau Raban Datai Enda Beradat ( PATI).
“Semua kes tu beungkus RM4,231,340,” pia ku iya madah maya pengerami ngintu Hari Polis Ke- 212 Polis DiRaja Malaysia Renggat BN10, PGA Sibu ba Kem PGA Lanang ditu, kemari.
Sama bela datai maya tu iya nya bini iya Chairperson Gerempung Peng- intu Pengelantang Polis ( PERKEP) Rolia Hamed sereta Pemantu Pemesai BN10 PGA DSP Frediel Nyambong enggau bini iya Helena Jubing. Sanudin maya tu mega madah, ungkup taun tu ny- entuk bulan Mac sida mujur mutarka kes beungkus RM1,372,350.
“Ba kes kayu nadai lisin, penyampau iya nya RM1,318,500 lalu ditangkan kes ngerampas barang ke dibai ngagai menua tu enggau chara belalai beungkus RM53,850 nyengkaum siti kes PATI,” ku iya madah baru.
Ba pengerami tu, Sanudin dipebasa nyuaka surat basa Komander Briged Sarawak enggau enggau surat basa Pegawai Pemerintah BN10 PGA Sibu ngagai bala penerima nyengkaum raban media.
Kelimpah ari nya, iya bela macha teks jaku Kepala Polis Menua beserimba enggau pengerami ke diatur sehari nya.
Mensia mayuh ke bis datai maya pengerami tu mega diperindang enggau program mandangka tanggungpengawa raban PGA mutarka pengawa begempuru enda beradat.