Kunteriktor Bumiputera deka diberi awak dalam projek besai
Perintah Sarawak benung ngelangkar mekanisma ti ulih dikena kunteriktor Bumiputera ngambi bagi dalam tinda tebuka
KUCHING: Perintah nengeri Sarawak diatu benung nusun atur mekanisma ti ngulihka kunteriktor Bumiputera ngambi bagi ba dalam tinda tebuka nyengkaum projek ti besai ti deka digaga ba nengeri tu.
Kepala Menteri Datuk Patinggi Abang Johari Tun Openg madah,nengah tusun ti digaga nya ulih dikena nemu kereja dalam pakej ti besai kena kunteriktor Bumiputera nengah tinda tebuka.
Iya madah mega, tu ulih mai kunteriktor Bumiputera besemekih enggau diri sama diri enggau manah dikena sida ngulihka tinda.
“Tu kedeka kitai enggau nya ngarapka ulih meri pemanah ngagai chara kitai magi kereja ngagai kunteriktor Bumiputera ba nengeri tu,” ku iya ba pengawa pengerami makai malam lalu bejakdika Aum Besai Ninting Taun Persatuan Kunteriktor Melayu Malaysia(PKMM) Sarawak Ke-20 2019 ba sebuah hotel ba ditu malam kemari.
Pia mega Abang Johari madah, iya sebedau tu udah ngatur pengawa betemu enggau tuai megai PKMM, Dewan Usahawan Bumiputera Sarawak (DUBS) enggau Balai Dagang enggau Industri Dayak (DCCI).
“Udah aum nya tembu aku lalu ngangau pemesai ke megai duit nengeri dikena sida nyadi siti pengawa ngambika nemu agi enggau nenak bekaul tinda.
“Projek besai ti udah dikereja kitai ba Sarawak 30 peratus ari kereja nya dibuka ngagai kunteriktor Bumiputera ngambika Bumiputera ulih besemekih sama sida dikena ngaga kereja kereja ba dalam pakej ti besai,” ku iya seraya nambah pengawa nya ti udah digaga ba Sarawak Energy Berhad (SEB).
Naka ke diatu ku iya, sida ti megai belanja nengeri udah ngaga chara tauka benung ngaga tusun atur dikena muka tinda ke alai sebagi ari kereja ti ulih digaga kunteriktor Bumiputera lalu dibuka khas ngagai Bumiputera aja.
Sepengudah mekanisma enggau prosedur nya mujur, Abang Johari madah, sida ti bekuasa deka ngangau semua tuai ti megai gerempung kunteriktor Bumiputera enggau baum dikena nemu timbal sida sekalika setuju enggau cara nya tauka enda.
“Tu iya nya polisi perintah Sarawak ba baruh Gabungan Parti Sarawak (GPS) ti sama meri peluang ngagai semua kunteriktor ngambika sida bulih projek ari kereja-kereja ti deka dipealaika ba nengeri tu,” ku iya.
Kelimpah nya mega, iya madah, Sarawak deka nyadi ‘richah’ agi dalam timpuh ba enam taun ti deka datai lebuh perintah nengeri deka mekuh ngagai pemansang infrastuktur kelebih agi ba menua pesisir.
Padah iya, ungkus ti deka dikena semanjai timpuh nya datai ba RM16 bilion ti mungkur mayuh macham projek pemansang ti bekaul.
Iya mega madah,semua Kaban Kunsil Nengeri(ADUN) disedia enggau belanja ba baruh Program Pemansang Menua Pesisir (RTP) nyengkaum Kaban Parlimen GPS, lebih RM700 juta setaun dikena ngaga projek ba tempat diri empu.
Ba dalam pengerami nya,iya mega madahka perintah nengeri deka berunding meri sebidang tanah ngagai PKMM Sarawak dikena sida ngaga opis sida iya.
Enggau nya,iya ngingatka kunteriktor ngambika bejalaika kereja enggau manah lalu ngena peluang enggau manah.
Abang Johari mega nyuaka Anugerah kunteriktor Cemerlang ti diterima Khazanah Enterprise, Serikat Maaz General Trading, Serikat Boh dan Chu,Kompeni Zul Global, Wilma Enterprise, MCP Resources Sdn Bhd, Vista Trade Sdn Bhd, Kurnia Matang Sdn Bhd.
Sama datai lebuh pengerami nya,Presiden, Mantan Tuai Pemegai Menua Tun Salahuddin, Menteri Muda E-Dagang Datuk Mohd Naroden Majais,Kaban Parlimen Petra Jaya Datuk Seri Fadillah Yusof, Kaban Kunsil Nengeri (ADUN) Simunjan Awla Dris, ADUN Tupong Fazzruddin Abd Rahman, PKMM Datuk Mohamed Fadzill Hassan, Yang Dipertua PKMM Sarawak Datuk Ismail Suut enggau temuai ti dipebasa ke bukai.
Tu kedeka kitai enggau nya ngarapka ulih meri pemanah ngagai chara kitai magi kereja ngagai kunteriktor Bumiputera ba nengeri tu.
Datuk Patinggi Abang Johari Tun Openg Kepala Menteri