PSB diatu majak teguh sereta nerima mayuh sukung: Wong
KUCHING: Parti Sarawak Bersatu (PSB) diatu majak teguh lalu nerima mayuh sukung, pia ku Presiden PSB Dato Sri Wong Soon Koh lebuh ti bejadika papan tanda parti ke baru ba Opis PSB, kemari.
Wong madahka, kena 22 Februari nyin kemari nama parti tu ti keterubah (UPP) udah dikemendar Pendaftar Pertubuhan (ROS) lalu ditukar ngagai PSB. Ku iya, sekalika UPP tauka PSB tetap sebaka lalu ngemeranka pemerat pengelikun mensia mayuh enda ngira bansa, jalai pengarap enggau adat.
“UPP tauka PSB endang sebaka tang semina betukar nama parti aja. Kitai deka sama bela ngintu pupu raban mensia enda ngira bansa, jalai pengarap enggau penatai sida.
“Parti tu sigi tebuka ngagai mensia mayuh ba Sarawak. Lebuh nama parti tu ditukar ngagai PSB, kami nerima mayuh kaban baru kelebih agi sida ke datai ari menua pesisir enggau mengeri,” ku iya.
Bepelasarka penemu ti diatur PSB, sida nerima timbal ke manah ari mensia mayuh. Wong nambah, naka ke diatu sida bisi 26 iti pampang PSB ba serata menua Sarawak sereta urung 38,000 iku kaban udah ngerejista diri nyadi kaban PSB.
“Diatu kami bisi 38,000 iku kaban PSB udah direjista lalu penyampau tu deka nambah ninting taun sama mega enggau pampang parti kami.
“Kami mega bisi pampang ti keterubah dipenyadi baka ba Skrang, Engkilili bisi 5 ,000 iku nyukung parti tu, Selangau (8,000), Ngemah (3,000), Krian (3,000) lalu penyampau tu deka nambah 10,000 iku kaban baru dalam timpuh di deka datai jemah ila.
“Kami deka ngemesaika ka agi pampang parti nyengkaum Marudi, Baram, Samalaju (Bintulu), Sri Aman enggau endur ke bukai,” ku iya.
Lebuh ditanya bekaul status PSB, Wong madahka deka meri sukung ngagai perintah nengeri Sarawak kelebih agi Datuk Patinggi Abang Johari Tun Openg bekaul enggau pemansang nengeri Sarawak.
Kelimpah ari nya, Wong siku ari Kaban Kunsil Nengeri (ADUN) Bawang Assan madahka sida empai temu agi deka nganjung parti tu bepilih ba Pengawa Bepilih Nengeri (PRN) ti deka datai.
“Kami enda nemu sereta bedau mansutka pemutus beserimbai enggau atur pengawa tu.
“Tang kami sebedau nya udah minta ngagai ROS kena 10 Disember 2018 lebuh ti deka meri nama baru parti tu. Perambu tu udah dikemendarka Aum Delegasyen Khas nyengkaum tanda lambang PSB ke baru mega,” ku iya nambah.
Sama ngulu pengawa tu Sapit Ketuai PSB pia mega ADUN Mambong Dr Jerip Susil, Ketuai Unit Nembiak PSB (ADUN Engkelili) Dr Johnical Rayong Nyipa, Naib Presiden Kanan (ADUN Opar) Ranum Mina, Sekretari Besai George Lo, enggau Penyanding Penemu Parti Dr Chou Chu Ming.